藍田婆婆馬路中心仆倒！2暖男衝出救援 後車竟狂呠 片主開門一句KO全網讚好

藍田婆婆過路心急仆倒 兩名英雄港男零秒出手相救

事發喺本月11號朝早8點44分，地點係藍田興田邨對開嘅連德道燈位。從片主嘅車CAM畫面見到，一位撐住雨傘當拐杖嘅婆婆，眼見綠公仔開始閃爍，就心急想快步過馬路，點知一個唔小心，成個人向前仆倒喺馬路中心！喺婆婆前面嘅兩名男士一見到，完全冇半點猶豫，即刻轉身跑返轉頭救人. 佢哋冇粗暴咁將婆婆扯起，而係一左一右小心翼翼咁扶佢起身，其中一位較年輕嘅短褲男仲好細心咁幫婆婆執返跌咗落地嘅膠袋。當時對頭線嘅一架的士見到意外，亦都好有耐性咁停車等候，場面非常溫暖。

後車司機無視死火燈狂呠 網民洗版怒轟趕住去投胎

正當大家以為事件會喺一片溫馨之中解決，刺耳嘅噪音就出現了！片主其實一早已經打咗死火燈提醒後方車輛，但佢後面架車嘅司機，竟然完全無視前方情況，開始瘋狂長按響咹，咹聲係「一按到底」嗰種，完全冇停過！呢個冷血行為即時引爆網民怒火，事件曝光後，大批網民喺群組洗版鬧爆：「後面呠乜Ｘ野，趕住去投胎？」、「香港啲司機就係鍾意呠」、「打得死火燈就實有事，後面食Ｘ」，狠批後車司機毫無同理心，淨係識製造噪音。

片主正義感爆棚開門喝止 一句KO獲封年度最佳車CAM

面對後車司機嘅瘋狂響咹，片主終於忍唔住正義感爆棚！佢直接打開車門，向住後車大喝一句：「等陣吖，前面有人跌低咗呀！」呢個霸氣舉動即時KO咗後車司機，車CAM片亦喺呢度中斷。片主呢個行為，連同兩位暖男嘅義舉，獲得網民一致讚揚：「好有愛！cam主都好好，要表揚應該要一齊表揚！「、「片主好波」、「除咗兩位男士，個車主都值得讚」，大讚佢哋三個都係「香港男人典範」，令呢段片毫無懸念地成為網民心目中嘅年度最佳車CAM片！