阿媽暗黑料理挑戰膽量！港男呻煎蛋驚見密集黑點 網民嚇到嘔：似清出嚟嘅黑頭！

阿媽沉迷健康食材奇亞籽 創意爆發炮製發霉煎蛋

事主喺Threads出Post，大呻母親每隔一段時間就會迷上某種食物，而今期嘅「寵兒」就係被譽為超級食物嘅「奇亞籽」。點知阿媽嘅熱愛程度已經去到走火入魔嘅地步，竟然連煎蛋都唔放過！從事主分享嘅相中可見，一隻本應金黃香脆嘅煎蛋，表面竟然佈滿密密麻麻嘅黑色點點，視覺效果極為震撼。事主睇見呢碟「暗黑料理」都忍唔住崩潰求情：「放過蛋好嗎……好像發霉……」，形容呢碟創意煎蛋似發霉一樣，令人胃口全失。

網民睇見相即刻密恐發作 驚呼似足黑頭粉刺超嘔心

帖文一出，隨即在網上引發洗版式討論，大批網民直呼「頂唔順」！呢碟「奇亞籽煎蛋」嘅密集畫面，瞬間觸發唔少人嘅密集恐懼症，留言大嗌：「OMG！我密恐症發作」、「睇見都起雞皮」。更有網民發揮創意，作出超嘔心比喻，鬧爆道：「黑頭粉刺嗎？」、「成碟清出嚟嘅黑頭咁，點食呀？」，形容得相當有畫面，令唔少人表示睇見都想嘔！

健康食法掀兩極討論 網民提醒亂食隨時引發腸塞

雖然賣相嚇人，但亦有網民大讚事主媽媽「好可愛」、「媽媽好捧」。不過，事件亦引發另一層次嘅討論，有網民就食法提出質疑，認為呢種煮法完全浪費咗奇亞籽嘅營養，「奇亞籽熱過之後營養流失，這樣應該就不會拿去煮了」。更有網民作出嚴重警告，提醒奇亞籽嘅正確食法：「奇亞籽要先泡水至少半小時再吃，不然會造成腸堵塞的說法」，指出如果未經浸泡就直接食用，隨時對腸道構成危險，睇嚟大家追求健康之餘，都要用啱方法先得！