機場1對男女推行李車硬搭扶手電梯 行李飛脫卡死後路人一個動作令男子苦笑

行李車硬搭扶手電梯中途飛脫卡死梯級

事發於6月1日星期一下午，香港國際機場客運大樓1樓，一對男女推住行李車及兩件大型行李箱搭乘扶手電梯落地面。搭乘期間行李突然飛脫，反轉倒卡在扶手電梯梯級之間，電梯隨即停止運作. 戴鴨舌帽女子在梯間彎腰扶起行李箱，男子則在後方吃力緊握行李車不停調整位置以防滑落，場面極為狼狽。鏡頭一轉，兩名機場制服職員已經在電梯下方等候處理，而扶手電梯出口處亦留有一個黑色行李箱。當女子快將到達地面時，男子仍然困在扶手梯近頂端位置，旁邊有路人指向後方提醒該處設有升降機，男子獲悉後只能無奈苦笑。

目擊者拍片公審網民群起鬧爆轟自私

事件曝光後，目擊者godliuart將30秒影片上傳至社交平台Threads公審，大批網民替其他使用者不值，群起圍剿片中兩人。網民鬧爆兩人行為極度危險兼自私，直斥「就算無架行李車，拎住咁大件行李都唔會搭扶手梯」、「明明有𨋢點解係要搭電梯」，更有人驚呼「企佢哋前面分分鐘直上天堂」，擔憂萬一前方有長者或小朋友後果不堪設想。有網民要求機管局追究責任，亦有人促請若有損壞應賠償後才放行。

網民揶揄護照應加IQ評分惹全城熱議

除咗鬧爆之外，網民更加極盡揶揄之能事，笑稱「有錢買機票，但買不到文明」、「強烈要求本Passport加埋IQ評分」，又諷刺「21世紀原來都仲有人唔明扶手電梯同𨋢嘅分別」。有人更戲稱「想謀殺就真」、質疑男子是否蓄謀已久想用行李車做低身前女子。事件再次引起公眾關注機場扶手電梯安全問題，提醒旅客攜帶大型行李時務必使用升降機，切勿因貪一時之便而罔顧他人安全。