ATM撳錢遇新型騙案？陌生人$500紙入唔到機 1句恐怖提議嚇到港女即走

陌生人$500紙入唔到機竟大膽要求途人換錢

事主日前喺Threads發文，憶述當時喺銀行櫃員機提款嘅驚險一幕。佢指當時自己隔離有個人，正使用存款機，但手上張$500大鈔來來回回試咗好多次，部機都係「唔收貨」，原以為對方會就此作罷，點知對方竟然做出驚人舉動！該名陌生人見入錢唔成功，竟然轉身向事主同附近其他市民開口，問有冇人願意同佢「換錢」。事主當下即刻提高警覺，心諗：「我點知你嗰張係咪假鈔？」面對呢個咁唔合理嘅請求，事主為求自保，當然係即時拒絕，但事後諗返起都覺得心寒，於是將事件分享上網，提醒大家要小心。

網民群起公審鬧爆離譜行徑質疑係偽鈔或賊贓

事件曝光後，隨即引發網民洗版式鬧爆，一面倒力撐事主做法正確，並怒斥該陌生人行為極度可疑！大批網民留言表示：「我唔理張500蚊係真係假，但睇住部機唔accept就點都唔會換」、「櫃員機都唔收，憑咩覺得人哋會收？」更有人直斥對方厚面皮：「自己入唔到要人哋換張畀佢？夠癲！咁都問得出」、「佢面皮都幾厚」。不少網民更進一步分析，懷疑當中涉及騙局，擔心張$500紙幣可能係偽鈔，甚至是賊贓，「可能係偽鈔，可能係賊贓，一定唔會同佢換」，認為同陌生人換錢風險極高，隨時「好心做壞事」變代罪羔羊。

醒目事主成功避開陷阱網民大讚做法絕對正確

幸好事主夠醒目，冇跌入呢個潛在嘅「換錢陷阱」。網民紛紛大讚事主警覺性高，「做得啱呀！」、「肯換嗰個就真係傻」。有網民提醒，即使鈔票唔係假，只係比較舊或有摺痕，對方都應該去銀行櫃位處理，而唔係隨便搵途人幫手，呢種行為本身就極唔尋常。喺呢個「今時今日詐騙咁盛行」嘅時代，大家去拎個郵件都可以係詐騙，市民真係要時刻保持警惕，保護好自己嘅財產，千祈唔好因為一時心軟而招致無謂損失！