港女搭UO拒絕調位慘遭報復！大叔出陰招潑濕兼飛背囊 結局更心寒

事主付費揀位拒絕調動慘遭連環惡意攻擊

事主喺帖文怒訴，佢上機後有位女士問佢可唔可以換位，等佢朋友可以一齊坐，但因為事主係額外付費揀咗走廊位，而對方要求佢調去中間位，所以佢就直接拒絕。點知惡夢就此開始，該女士嘅男性友人坐喺佢隔離之後，先係「用右手大力撞我右手臂」，事主望向佢，對方仲要笑住道歉。之後更變本加厲，竟然趁事主瞓著覺，故意「用嘢飲倒落我件衫」，再叫醒佢話「知你睇下你件衫」，行為極度滋擾！事主當下嬲到即刻搵空少求助，雖然獲安排調到後一排座位，但恐怖經歷仲未完結。

網民睇唔過眼群起公審鬧爆賤格男乘客

事件曝光後，帖文隨即喺網上瘋傳，大批網民替事主不值，群起洗版鬧爆該名男乘客嘅行為「賤格」又無品！唔少人都話佢心胸狹窄，「嘩，個男人心腸都好壞下，唔調就報復咁！？」、「男人死cheap精，本身拎中間位去搵人調過個位都夠cheap，仲做埋啲黐線嘢」。更有大量網民認為事主過於啞忍，應該即時採取更強硬行動，「飛機降落之前，你就要同啲空姐講要求報警啦」、「而家先講已經太遲，一早就應該發難」。亦有醒目網民教路，下次遇到同樣情況可以市儈啲回應：「次次有人搵我調位，我都同佢講畀咗錢買，畀返錢我就畀個位佢」。

空少介入仍未解決事主嘆報復行動再升級

最令人心寒嘅係，即使空少已經介入事件，將事主調離滋事乘客，但對方嘅報復行為並無停止，反而喺落機時變本加厲！事主大呻，喺落機拎行李嗰陣，對方竟然故意用背囊同埋行李「飛落我度，扮唔小心」，明顯係惡意攻擊。成個經歷由機上延伸到機外，完全係有預謀嘅報復，難怪事主會覺得咁離譜要放上網公審。唔少網民都慨嘆，遇到呢種「西客」真係防不勝防，唯一可以做嘅就係即時向機組人員投訴，甚至要求報警處理，以保障自身安全。