小紅書劣行+1！遊客攻陷浪茄灣「抱樹」打卡 模仿Eason封面玩到斷枝 勸阻竟遭惡言相向？

模仿Eason封面扮馬騮上樹 遊客無視警告膠帶硬要爬

呢股「抱樹」打卡潮源於有小紅書用戶分享模仿歌手陳奕迅（Eason）《不想放手》專輯封面的相片，引嚟大量遊客跟風。從網上瘋傳嘅相片可見，唔少遊客爬上樹後，以雙手雙腳夾實樹枝，做出「馬騮上樹」等高難度動作，更有人為咗影相，直接喺樹枝上玩「引體上升」。最離譜嘅係，即使政府部門早已喺受損樹木周圍拉起「危險警告」膠帶，明確禁止攀爬，但遊客們依然視若無睹，繼續排隊輪流拉扯樹枝打卡，令原本已受傷嘅樹木傷上加傷，枝幹出現明顯下垂及結構性損毀。

網民睇到眼火爆鬧爆無家教 斥最高可罰$25,000兼坐監

事件曝光後，大批網民替樹木不值，喺各大討論區群組洗版鬧爆！唔少人怒斥遊客行為「似馬騮戲」、「完全無家教」，直指「棵樹已經受傷，快樂建築在受傷的樹木上」、「呢啲歪風不可長」，更有人擔心遊客「所到之處寸草不生」。有網民翻查法例，指出根據香港法例第96章《林區及郊區條例》，任何人士損毀郊野公園嘅樹木，最高可被罰款$25,000及監禁1年，呼籲當局加強執法，嚴懲破壞生態嘅缺德行為。

目擊者勸阻反被當耳邊風 環保團體揭幼樹慘遭毒手

更令人髮指嘅係，有本地行山人士曾親眼目擊整個過程，並好言相勸，提醒遊客此舉屬違法行為，但對方竟然「扮聽唔到」，態度惡劣。另外，環保組織「綠色希望」亦發帖，指在浪茄灣進行清潔活動時，發現連一棵纖細嘅幼樹都難逃毒手，被遊客無視警告膠帶強行「抱樹」打卡，導致樹幹已向一側嚴重傾倒，情況岌岌可危。一幕幕令人心痛嘅畫面，再次揭示部分遊客為打卡可以去到幾盡，完全漠視對大自然嘅尊重。