月入2萬8會計仔為愛豪擲$1500萬！6年狂簽400張支票 結局神反轉

會計主管6年半鯨吞$1500萬！冒簽逾400張支票呃到盡

案情指，現年48歲嘅被告譚俊鋒，喺一間派對用品公司擔任會計主管，而且係會計部唯一職員，深得東主信任。點知佢就係利用呢份信任，由2017年8月起，展開長達6年半嘅瘋狂盜竊計劃。佢利用職務之便，先後冒充東主簽名開出超過400張公司支票，總共盜取超過$1,500萬公款！為咗掩人耳目，佢更喺會計紀錄上造假，訛稱款項係用作公司採購，手法極之純熟，完全當公司係自己嘅私人提款機！

贓款全為供養性工作者女友！網民鬧爆：為愛情定係做水魚

事件曝光後，大批網民替事主東主大感不值，鬧爆被告行為離譜！最令人嘩然嘅係，被告喺庭上求情時透露，佢將鯨吞返嚟嘅$1,500萬巨款，全數用喺賭博同供養一名從事性工作者嘅女友身上。據指，佢結識該名女友後，就不斷被對方索取金錢，最終為「愛情」走上不歸路. 網民紛紛留言鬧爆：「月入兩萬八，學人養千萬情人？」、「究竟係偉大愛情，定係世紀級水魚？」、「信錯一個人，成間公司差啲無咗！」，群組瞬間被洗版，個個都話被告極度愚蠢！

自爆罪行僅還款13萬！官斥嚴重違誠信重判監6年5個月

紙包唔住火，直到2024年，被告因為工作表現差面臨被炒，自知東窗事發，先頂唔順向東主「自爆」成件事。雖然佢其後有向公司償還$13萬，但相對於盜取嘅$1,500萬，簡直係九牛一毛，連1%都無！法官喺判刑時嚴斥被告嚴重違反誠信，而且犯案時間長、次數多達419次，顯示係有預謀犯案。考慮到佢主動認罪，最終就5項盜竊罪判處佢監禁6年5個月，為呢段荒唐嘅「愛情」故事，付出沉重代價。