大圍惡客爭$2車資發爛渣！4分鐘片直擊車長被撞跌經過 兇狠一句「我一定投訴你」辣㷫全網

惡客夾埋$14蚊想搭$18.1巴士？車長提醒反被爆粗喪鬧

事發於本周四（23日）下午約5時半，一輛城巴B8線在大圍站總站上客，一名年約40歲、帶有酒氣的男子與女伴上車。當車長提醒他拍卡時，男子拍卡後卻因餘額不足而失敗。車長好心提醒：「呢度只得幾蚊，先生」。點知該男子竟指示女伴用現金付款，惟女伴表示「冇錢」，男子即場怒罵女伴：「你真係唔死都冇用」。兩人左摷右摷，最終只湊夠$14現金，距離$18.1的車資仲差一截。車長見狀即指出：「18蚊嘛，你揼14蚊落嚟！」，並強調「咁你依家冇俾(錢)喎！」。該男子聞言即時發爛渣，大聲反問車長：「你咁大聲做乜嘢？」、「我冇畀錢咩？」。車長不甘示弱反擊：「依家係你兇開我呀，先生！」、「冇錢可以唔上車嘛！」，惡客竟爆粗辱罵並威脅：「你老母臭X，我一定投訴你」。

網民睇唔過眼群起公審！怒斥唔夠錢仲要惡過人

事件曝光後，該段4分04秒的足本影片在各大社交平台及群組洗版，大批網民替車長不值，紛紛留言鬧爆該名惡客的行為離譜至極！網民一面倒力撐車長，怒斥：「搭車比唔夠錢仲咁大聲，真係未見過」、「唔夠錢仲要惡過人，咩世界？」、「自己唔啱仲要發爛渣，仲要郁手郁腳，一定要拉佢！」有網民更直指該男子行為是「影衰香港人」，認為即使有任何理由，都不應向盡忠職守的車長施襲，希望警方盡快將兇徒緝拿歸案，還車長一個公道。

衝突升級車長慘被撞跌送院！惡客卸膊大叫佢自己跌低

面對惡客的無理取鬧及粗言穢語，車長決定停車處理，並表明「你投（訴）啦，我唔開（車）！」。從影片可見，車長其後落車並手持電話，懷疑正在報案。該名惡客亦不罷休，跟隨落車並不斷逼近車長理論。車長連番退後避讓，最終懷疑被對方用胸口撞跌倒地。惡客見狀竟第一時間卸膊，向途人大叫：「佢自己跌低咋！」。片段最後見到車長自行站起。據悉，遇襲車長事後清醒送院治理，警方已將案件列作「襲擊致造成身體傷害」跟進，正追緝該名在逃男子。城巴發言人亦證實事件，表示會全力配合警方調查。