天氣過山車！天文台突發警告冷鋒周四殺到 氣溫插水10度兼迎狂風雷暴

周四氣溫插水式急降新界最低驚見17度

根據天文台最新預測，現時位於廣東內陸嘅冷鋒會喺聽日（23日）日間橫過沿岸地區，屆時驟雨會逐漸增多，仲會有幾陣狂風雷暴！最關鍵嘅係氣溫將會逐步下降，由日間最高27度，到午夜會跌至大約23度。到咗星期五（24日）朝早天氣會更涼，市區最低氣溫只有20度，新界地區更會再低一兩度，好似石崗同上水預料得18度，而打鼓嶺更加會跌到得返17度！短短一日溫差接近10度，各位出門口真係要著多件衫！

狂風雷暴夾擊五一黃金周隨時凍過水

天氣突變消息一出，即刻引起全城打工仔同準備放假市民嘅熱議！事關今次壞天氣似乎會持續一段時間，直接影響到嚟緊嘅周末同五一黃金周. 天文台預料高空擾動會喺星期五帶嚟較大雨勢，而隨後嘅周末雖然天色稍為好轉，但仍然有幾陣驟雨。最令人洩氣嘅係，下周中期天氣又會轉差，由下周二（28日）起一連三日都會有驟雨同狂風雷暴，睇嚟想喺黃金周假期享受陽光與海灘，機會相當渺茫！

天文台預告濕凍天氣最少持續到勞動節

大家唔好以為凍一兩日就完，天文台預料一道低壓槽會喺下周中期持續發威，為華南地區帶嚟不穩定天氣。由下周二（28日）起至下周四（30日），本港將會間中有驟雨及幾陣狂風雷暴。而到咗5月1日勞動節假期，亦即係內地五一黃金周首日，天氣依然麻麻，大致多雲兼有幾陣驟雨。睇嚟今次嘅濕凍天氣將會橫跨成個星期，大家嘅假期計劃可能要重新部署喇！