以巴衝突｜港人YouTuber Ming仔身在以色列現場　親述打仗驚險場面

Oct 10 2023

元祖YouTuber之一的Ming仔近日去以色列耶路撒冷玩，誰知有天一瞓醒就剛好撞正巴勒斯坦組織哈馬斯（Hamas）對以色列進行多線大突襲，正式宣戰打仗！網民當時得知Ming仔身在當地已大感憂心，而Ming仔亦有更新自己最新情況。昨日（9日）Ming仔開直播向大家報平安，交代逃離戰場全過程，更指自己身歷多次災難，今次屬最高級別。而他報平安後，多位藝人及KOL即留言表示關心。

以巴衝突 youtuber Ming仔 Ming仔近日去以色列耶路撒冷玩 — Ming仔近日去以色列耶路撒冷玩（圖片來源：Instagram＠mingjai14）

以巴衝突 youtuber Ming仔 ming仔直播講返以色列返嚟的過程 — Ming仔直播講返以色列返嚟的過程（圖片來源：YouTube＠mingjai14）

Ming仔睇住哈馬斯「捉人質」當地朋友去應戰

Ming仔直播一開始講返自己到以色列當地旅行，上星期六起身去咗跑步，突然聽到以色列響起全國警號，同埋爆炸聲，後來得知當地正式進入戰爭狀態。而好彩Ming仔剪片時曾經了解過當地歷史以及聽過警號聲，所以知道一定有事唔對路。由於當日為安息日，所以大部分餐廳都無開，當時他以為自己要捱餓數天，好彩後來有一名當地認識的朋友作聯絡，該朋友即刻接待Ming仔到他家中。Ming仔表示當時與朋友一直看著新聞，看到哈馬斯於音樂會「捉人質」的情況，心情相當複雜。後來自己的朋友收到國防部電話，需要立即去應戰，Ming仔當時看著朋友即時「pack嘢」，對方女朋友更淚流滿面，但自己「無嘢可以做到」。而這位朋友被徵召後，仍載Ming仔回Airbnb才走。Ming仔表示好感激呢位當地朋友，最後仲非常照顧佢。

以巴衝突 youtuber Ming仔 ming仔去咗跑步突然聽到爆炸聲 — Ming仔去咗跑步突然聽到爆炸聲（圖片來源：Instagram＠mingjai14）

幸好搭到最後一班機　機場曾出現恐慌

Ming仔指當時回到Airbnb即火速洗澡，帶同行李離開，由於擔心局勢或會加劇，屆時難以去到機場，於是自己提前一日出發機場，「周街問人邊度有的士，問問下見到有架的士駛過，即刻截車搭，但期間好多警車，如果唔走可能走唔甩，所以叫司機開快D」。最終幸而順利到機場，但在機場大堂突然有人大叫「it’s coming」，大家聽到警報後，現場即時出現恐慌，變到相當混亂。Ming仔指自己跟著地勤行秘道去後樓梯的地方躲避起來，見沒什麼動靜大家再行出大堂，同樣動作發生了前後2、3次左右。後來他認識了一些同行的朋友，大家一直等到上機，終於成功提前回到香港，而他更表示「搭嗰班應該都係係最後一班」。