柴灣男公廁駁喉洗車斷正！網民踢爆離譜行徑 隨時硬食$20萬天價罰款兼坐監？

柴灣男公廁駁喉洗車直擊離譜過程全公開

事發地點位於柴灣常安街城巴車廠對開，有網民上載多張「罪證」相片到Facebook群組「車cam L（香港群組）」，怒問：「大家有冇見過呢啲自私X？」。從相中所見，一名男車主正為座駕進行「大清洗」，車身佈滿白色泡沫。但水源竟然係嚟自旁邊嘅常安街公廁！該名車主將公廁嘅無障礙洗手間大門打開，再用一條自備嘅長喉管，直接接駁到洗手間內嘅洗手盆水龍頭，當正自己屋企咁用。洗車產生嘅大量污水夾雜住清潔劑泡沫，搞到地面濕晒一大片，嚴重影響市容，更佔用咗傷健人士嘅廁所設施，行為極之缺德。

網民洗版鬧爆自私行為直斥犯法應即舉報

事件曝光後，大批網民替事主不值，隨即在群組洗版式公審，鬧爆該車主行為「狼死」又自私，「拎個桶去公廁裝水洗車嘅都已經係X街，呢位唔知點形容嘅，駁埋喉當正自己屋企咁」、「偷水報警，街道上洗車報食環，分兩個case」。更有網民不解其慳錢心態，直言現時自助洗車屋收費相宜，「柴灣工廠區有自助洗車屋，好似一嚿水唔使，揸得車都中產啦，何苦呢」，認為該車主為慳少少錢而犯法，實在得不償失，紛紛表示應該向1823或相關部門舉報。

隨時面臨$20萬罰款兼監禁雙重法律後果

今次呢位車主隨時「慳字唔識寫」，分分鐘要為自私行為付上沉重代價。根據香港法例第102章《水務設施條例》，任何未經許可由水務設施轉駁用水即屬犯罪，最高可被罰款$25,000。此外，其洗車污水直接排到街上，亦可能觸犯第358章《水污染管制條例》，非法排放物質入公用排水渠，一經定罪，初犯最高可處罰款$20萬及監禁6個月。為咗慳幾十蚊洗車錢，最終可能要硬食天價罰款兼惹上官非，真係諗唔明！