細數網民各種Carousell交收經歷！講價、甩底已是濕濕碎 ｜玩樂熱話
細數網民各種Carousell交收奇聞經歷！
1.講價達人
香港人真係好鐘意講價！講價從來唔係問題，但一開口就要求半價，似乎就太過獅子開大口，有人話交易你情我願，咁又無錯，有啲買家幾蚊都鏗，被網民狠批「乞衣」。
2.「驗屍官」買家
有網民表示，曾經在平台上賣電話，內文已經寫齊電話狀態及情況，亦有拍攝清晰照片，結果遇著「驗屍官」買家，當場驗咗半個鐘，最後仲同賣家講價。
3.飛機友
約交收最怕遲到同被人放飛機！但並唔係每一個人嘅時間觀念都咁好，甩底情況日日上演，網民都忍唔住分享自己嘅慘痛經歷，試過幫買家留貨兩星期，點知最後先話唔要，除咗嘥時間，有時連車錢都蝕埋，真係睇見都嬲。
4.唔睇詳情伸手黨
網友直罵好多買家都係「文盲」，內文寫埋詳細資料，但全部都無人會睇，令佢非常氣憤。
5.「被」遲到
有網民就話，曾經試過約好時間交收後，對方提早一大截時間到，仲不斷催促佢要佢快啲到，莫名其妙被冠上遲到罪名。
6.假交易真詐騙？
網民分享有一次出售貨品嘅經歷，買家資訊睇落已經好可疑，更加以唔熟路為理由，要求網民提供屋企地址，不禁令人懷疑對方企圖！有其他網民就指出呢一類型嘅人其實都係騙子。
7.二手當全新
除咗有好多奇怪買家之外，有網民都分享自己曾經在網上買手機嘅經歷，佢表示賣家標明「全新」，點知到手竟然又花又爆Mon，笑言「改變咗我對全新嘅睇法」呀！
8. 錢都唔想畀 搲免費禮物！
以上全都是濕濕碎，曾經有網民收到Message想搲免費禮物，他先是表示自己很想要該件物品，但身上又沒有錢，所以請求賣家可免費送出，更承諾會好好珍惜及使用。
除此之外，仲有多不勝數嘅交易趣事，例如有網民在網上免費送出十幾本書，但買家要求對方大西北直入九龍東，免費送上門，仲有買$10二手書要求包郵等等，各種行為都令人覺得匪夷所思，旁觀者睇可能會覺得好笑，但如果自己遇著這類買家，真係無辦法唔嬲呀！
資料來源：連登討論區
什麼是二手買賣平台Carousell？
Carousell 旋轉拍賣是一個手機分類平台，買家與賣家可隨意自由交易二手商品。
如何避免遇到交易怪人？
可以選擇評分較高的買家或賣家進行交易，同時提防透露個人資訊給予對方。
