2015AIA歐陸嘉年華
2015AIA歐陸嘉年華

2015 AIA歐陸嘉年華試玩報告!10大必玩機動遊戲全攻略!【中環好去處】

熱話

廣告

7/1/2016優惠行情更新!

未去玩AIA歐陸嘉年華的朋友要留意了!1月份有優惠!由即日起去到29日(15/1除外),週一至五,凡購買一張成人門票(港幣125元),其中一位同行之成人或小孩可享免費入場及一共10個代幣。又有多個藉口去嘉年華燒錢了!不過去玩之前,就睇下機動遊戲試玩報告先啦!

AIA歐陸嘉年華又返嚟喇!位於中環的嘉年華,都會有29款機動遊戲等你玩。今年更新增多個「親子機動」遊樂設施,大人小朋友都可以盡興而返。

記者Mandy今日已經急不及待去咗率先試玩,發現無論係攤位定機動遊戲都比上年吸引,即刻睇吓呢10個由我精選嘅機動遊戲啦!不過今日試玩階段,所有機動遊戲都仲未定價,想知抵唔抵玩,就要黐實我地,一有消息馬上為你update!

1. 全場最驚!MACH5

今年繼續有呢個「巴黎鐵塔反轉再反轉」,以時速110公里不停360度旋轉。先唔好講轉到頭都暈,仲有50米高嘅離心力,淨係停喺半空等另一邊車廂嘅乘客上車,都已經好考膽量!

尖叫度:★★★★★★(簡直嗌到爆晒標呀!)
玩後感:玩完落嚟就有少少暈,因為真係轉得太犀利,記住玩之前唔好食咁飽。

2. 巨型海盜船 Das Dun Schiff(15年新增!)

雖然海盜船聽落好似冇乜特別,但係今次呢隻海盜船,比主題公園嘅大,上到最高處有成差唔多20米,直頭斜到成個人企咗喺度,垂直咁濟!

尖叫度:★★★★☆
玩後感:比平時玩嘅海盜船刺激,唔知點解,玩完仲有少少暈船浪嘅感覺添。

3. 阿姐個心都離一離 踫踫車 Dodgems(15年新增!)

繼荔園之後,今次AIA歐陸嘉年華亦有踫踫車,而且仲係少數要排隊試玩嘅機動遊戲,睇嚟都幾受歡迎。

尖叫度:★★★☆☆
玩後感:雖然一次過有成20架車一齊玩,不過場內有工作人員協助「不熟車性」嘅朋友仔,就算撞埋一齊都好快分得開,非常貼心。

4. 尖叫無極限 No Limit

如果唔夠膽挑戰MACH5,可以選擇玩呢個輕量級嘅反轉再反轉。不過話就話輕量級,但係都有成32米咁高,除咗公轉仲會自轉,真係頭都暈埋。

尖叫度:★★★★★
玩後感:雖然係輕量級,但係都係勸大家玩之前唔好食咁飽……

5. 飛天韆鞦 Starflyer(15年新增!)

好多地方都有得玩飛天韆鞦,但係今次呢個有成40米高,本身見到咁高都已經驚驚哋,加埋不斷旋轉造成嘅離心力,比想像中刺激好玩喎!

尖叫度:★★★☆☆
玩後感:喺半空不斷旋轉,其實都幾凍,記住著多件衫先好玩呀。

6. 濕身飛船 Log Flume(15年新增!)

今日試玩階段,呢個濕身飛船仲未開放,不過記者都幾期待,因為呢個係全場唯一有機會濕身嘅遊樂設施。不過提提大家,最近天氣凍咗,如果玩到濕晒就好易病,所以記得帶多件衫替換呀。

預測尖叫度:★★☆☆☆

7. 飛天巴士 London Bus(15年新增!)

呢架飛天巴士,離地最高都只係大約5米,而且巴士外型靚,適合一家大細一齊玩。

合家歡度:★★★☆☆
評語:其實感覺幾似快版摩天輪,不過全程都坐倒頭車,唔慣嘅話都可能會有少少頭暈。

8. 小飛象 Dumbo(15年新增!)

記者由細到大都好鍾意小飛象,見親小飛象嘅機動遊戲都會即刻衝去玩,雖然唔係特別刺激,但係都幾啱小朋友玩。

合家歡度:★★★★☆
評語:小飛象升升降降咁都幾好玩,有少少少少離心力,加上小飛象外型嘅車廂,對小朋友嚟講應該都幾好玩幾刺激。

9. 輕量級海盜船 Rockin Tug(15年新增!)

如果怕海盜船對小朋友嚟講太刺激,咁呢個輕量級就啱晒你喇。雖然係輕量級,但係有怕死嘅朋友表示,其實都有d驚,所以不妨帶小朋友嚟挑戰一吓自己!

合家歡度:★★★☆☆
評語:相信呢架船外型已經可以吸引到唔少男孩子,就算唔玩,帶佢哋嚟影吓相都開心~

10. 聖誕列車 Santa’s Train(15年新增!)

AIA歐陸嘉年華橫跨聖誕檔期,所以都應吓節,推出呢個聖誕老人列車,帶大家行返幾個圈。

合家歡度:★★★★★
評語:相信所有小朋友都鍾意聖誕老人,今次坐上聖誕老人列車,實玩得開心啦!

除咗機動遊戲之外,其實仲有好多攤位遊戲,有超過100萬隻公仔等你帶返屋企,想知點先可以最易贏到公仔?就要留意住我哋嘅報道喇!想知更多影相打卡位,仲可以留意12月21日出版嘅新假期周刊!

友邦歐陸嘉年華2015

日期:17/12/2015 – 21/2/2016
時間:11am – 11pm (大除夕將開放至凌晨1am)
地點:中環新海濱
票價:成人$125(包10個遊戲代幣);小童及長者$90(包7個遊戲代幣)
詳情:www.tgec.asia

歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!

最新吃喝玩樂資訊