【18區掃食】太子直擊 爆膏蟹皇飯+肥厚菜甫蛋pizza

熱話

廣告

最近行太子發現咗一碗蟹黃飯,不過蟹膏多到完全遮晒個飯,極邪惡!太子美食又點止咁少?仲有快餐店高質滑蛋鰻魚飯、台灣平靚正家常小菜,米芝選推介山東餃子等等,仲唔即刻出發?食啦喂!

抵食台灣味 肥厚菜甫蛋pizza

店主媽媽是台灣人,此店特地開來紀念她。主打台灣家常菜,而阿廚更特登飛去台灣取經,而且大部份醬料均用台灣貨,將地道風味原汁原味帶返嚟。菜甫蛋就見得多,菜甫蛋pizza你又食過未?飽滿胖嘟嘟嘅樣真喺未食先興奮!一啖咬落去,香脆蛋皮包著香甜嘅菜甫,口感好豐富~必食!忍唔住一啖接一啖食落去!其他滷肉飯、大雞排呢啲基本嘢當然有啦,而且仲好高質添,樣樣幾廿蚊,又平又正,堅食得過!

B2
菜脯蛋披薩 $45 造型別緻,圓滾滾非常飽滿,俾埋pizza刀你慢慢切。
B3
香脆蛋皮包著自己再煮過嘅菜甫,入口香甜,配埋嫩滑蛋汁,正~
B4
香酥大雞排 $38 炸粉自己調較,就算擺凍咗都keep住脆,雞肉非常juicy,高水準之作!
B6
好媽媽滷肉飯(小)$22 抵食!滷肉肥瘦均勻,特登配合返香港人口味唔用咁肥既豬肉,另加入台灣醬料炮製,鹹香十足!
B7
芋香珍珠 $18 又點少得飲返杯珍珠奶茶呢,茶底、珍珠都喺自己煲,茶味好濃郁!

好媽媽台灣館

地址:太子荔枝角道100號金鳳樓地舖(顯示地圖)
電話:2330 3330
營業時間:星期一至五: 11:30am-4pm,6pm-10:30pm,星期六、日及公眾假期: 11:30am-10:30pm

迷你茶記發現 平價滑蛋鰻魚飯

呢間迷你茶記,只有兩張圓枱,裝修簡陋,行過都可能走漏眼,不過食落竟然有驚喜!滑蛋飯連飲品都喺$34,超正!學生幫襯仲有得平$2,良心小店!另外仲有滑蛋吉列豬扒、帶子蟹柳同叉燒飯等等,梗有一款啱你胃口!小店另外都有賣小食,好似炸燒賣、章魚燒,都喺十幾蚊就落到樓,而且店員們都Super SuperSuper nice!食都食得開心啲!

D1
滑蛋鰻魚飯連餐飲 $34 學生$32 即叫即整,蛋都算幾滑,鰻魚平均地分佈於滑蛋中,配埋照燒汁,正!
D2
章魚小丸子 $10/6粒 抵到爛,熱辣辣上枱,紫菜、沙律醬同燒汁落得一啲都唔孩寒!
D3
入面有兩粒章魚仔,超綿密,真心好食!
D4
酥炸燒賣 $12/8粒 一啲都唔油膩,炸得香脆,回味!
D5
老闆娘會問你落唔落沙律醬,食落嗰味又幾夾喎!
D6
似舊式外賣快餐店咁,一眼睇晒。

掂檔美食快餐

地址:太子荔枝角道175-185號嘉福中心地下4號舖(顯示地圖)
電話:2398 9809
營業時間:11am-8pm

阿姐現場即包 正宗山東餃子 

前幾年曾獲米芝蓮推介的餃子店,主打北方小吃同餃子,餃子皮用「手擀皮」製法,即係由和麵、擀皮,包餡都係人手整,餃子皮搓到薄一薄,仲經常見到店員姐姐們密密手包餃。餃子有數十款餡料揀,多菜少肉,粒粒包住滿滿嘅餡,勁滿足!想食甜品亦唔使轉場,因為呢度有山東招牌甜品拔絲香蕉同蘋果食!賣相好靚,甜到漏啊!

E2
翡翠餃 $44/10隻 小小一顆包住豬肉、韭菜、蛋同鮮蝦,鮮嫩多汁!鎮江醋放喺枱,隨便加~
E3
嚟個close up,皮薄、餡多!
E1
山東燒雞(例牌) $35 滷水夠入味,雞肉都幾滑,食嗰陣記住蘸埋蒜汁。
E4
拔絲蘋果/香蕉(雙拼)$68 一上枱即刻嘩一聲!好精緻!睇樣分唔出嫁,拮落去硬嘅係蘋果,軟嘅係香蕉,好香甜!
E5
好多香蕉蓉!
E7
包包包餃
E8
下午茶時間都有好多街坊幫襯。

阿純山東餃子

地址:太子荔枝角道60號地舖(顯示地圖)
電話:2789 9611
營業時間:星期一至二、四至日:11am-11pm,星期三休息

新張抵食價 火灸爆膏蟹黃飯

新開業的日式舖仔,主攻晚市和宵夜時段。阿廚曾於拉麵店和及居酒屋當過主廚,今次自立門戶,食材、賣相、味道當然一點也不馬虎。就好似招牌推介特激爆蟹黃飯咁,一見到個樣真喺嘩一聲,點解可以咁多膏嫁?入面原來用咗用咗中國生蟹膏、澳洲藍蟹肉同松葉蟹腳肉,煮濃咗之後加埋自家調製嘅秘製醬汁,再用火槍燒,蟹味超香超濃郁!!!超滿足!!!而家新開張試食價$118,好抵食!另外串燒即叫即燒,大虎蝦有成隻手咁大,彈牙惹味!如果你有咩新配搭想食都可以同阿廚溝通下,佢一定會盡力滿足你嘅要求!舖頭開到2am,嚟緊3月中仲會擴建,多啲位,宵夜best pick!

 

A1
特制激爆蟹黃飯 試食價$118 蟹膏多到見唔到飯,而且超級香!坐喺隔離枱都聞到!蟹膏濃郁甘香,唔捨得吞!咩係膽固醇?唔理lu,食咗再算!
A7
見唔見到有幾厚,哇哈哈哈~
A2
燒大蝦 $48 其他嘢食串燒都唔錯嫁,用咗大虎蝦,有成隻手咁長,而且夠彈牙。
A3
蒲燒鰻魚 $98 即叫即燒~濃香肉嫩,宵夜必食!
A5
店內只有幾個座位,舖頭外都有幾枱露天位。

魂燒

地址:太子太子道西106號地下D舖(顯示地圖)
電話:5401 1150
營業時間:6pm-2am

全球100間分店 台式古早甜品

來自台灣的甜點+飲品舖,全球分店多至100間,如新加坡、澳洲同印尼等。台式古早甜品,仙草、紅豆、珍珠等全部由台灣運來,仙草在台灣熬汁後運來港,再加粉凝結,食落甘涼順喉,好清甜!每款大大碗,配料多到食唔晒,都只不過係 $30,不妨一試!

G1
黑丸Q嫩雙寶 $30 有齊四款口味嘅芋圓,仲有仙草、紅豆同愛玉,配料多到暈,一個人食唔晒!
s
仙草爽彈,芉圓夠QQ,一啖食落肚,無敵。
G3
愛玉係檸檬味,好清新!
G4
3Q撞奶 $28 飲品都超多配料,有珍珠、紅豆同綠豆,飲完成杯都未食完!

黑丸嫩仙草

地址:太子荔枝角道57號榮光大廈地下B-2舖(顯示地圖)
電話:9689 6313
營業時間:2pm-12mn

燒味店不賣燒味 變身立雜惹味小食

之前本身賣開港式燒味,而家就無燒味賣,轉咗賣燒春雞、豬手,肉丸等惹味小食,立立雜雜,甚至連韓式炸雞都有,幾搞鬼!整間店都是廚房,門外只有兩個露天座位,店員都在廚房內忙著醃肉,想落單要大聲啲叫佢地出嚟啊!

C1
路邊燒春雞(原隻) $48 食落都有肉汁,而且雞肉唔會太老,買返屋企加餸。
C3
韓式炸雞(辣) $28/2件 有雞槌同雞胸,咬落好香脆,微微辣好滋味。
C4
仲送幾件薯角添!

燒味家族

地址:太子大南街4號A地舖 (顯示地圖)
電話:3956 8539
營業時間:11am-10pm

芝士撻以皮取勝 大件流心牛角酥

新開咗幾個月的麵包店,店內有自家廚房工場,麵包新鮮製作。芝士撻用5款法國芝士製作,雖然欠缺酸香層次,但牛油撻皮做得不錯,香脆鬆化,而且標榜低糖製作,食落更健康。除咗芝士撻,仲玩埋流心牛角酥,又幾新穎喎,有兩款流心餡,分別是榛子同藍莓,呢個堅流心!而且牛角酥入口帶陣陣牛油香,ok喎!

F1
原味低糖半熟芝士撻 $18 牛油餅底帶香脆口感兼有牛油香,用咗5種芝士製造,但仍欠酸香。
F2
雖然佢個名有流心兩隻字,但切開後都無野流出嚟嘅。
F3
榛子流心牛角酥 $18 凍食推介,大大個牛角酥,食呢個會好污糟,因為脆卜卜嘅酥皮碎會變到一地都係。
F4
堅流心,仲好多榛子粒粒餡,好有口感,食得過喎!

Oscar Bakery

地址:太子太子道西157號別樹華軒地下15號舖(顯示地圖)
電話:2706 0229
營業時間:11:30am-8pm

 

延伸閱讀:

【自助餐放蛇起底組】旺角$158任食 芝士x部隊鍋

|18區掃食|深水埗8大惹味店 芝士雞髀保齡球