|今期必試零食| 濃郁 香蕉味雪條 好味喎
廣告
超滑溜蕎麥麵
日清杯麵、公仔麵就食得多，今次這個日本直送的即食蕎麥麵，乾麵餅以非油炸方式製作，有埋濃縮的木魚湯汁，加水開稀就得，方便易煮。湯汁好香鰹魚味道，不算太鹹；麵質軟滑彈牙，沾上湯汁後直程跣入喉嚨！
今周最伏！桃味奶茶水
粉紅色樽身好Fancy，幾有春日賞花氣息。聞落有好香的蜜桃味，點知一飲就中伏， 完全無奶茶味， 甜得過分，而且唔覺有奶茶的幼滑口感。仲寫明內裡無果汁，咁咪即係桃味香精？
糖醋薯條點Jack
唔止麥當勞，連卡樂B 薯條都玩點醬。原味薯條脆卜卜、微鹹帶薯仔香，粉感較重；黑醋醬有驚喜，酸酸甜甜，好似糖醋骨的味道，蘸薯條食就超夾。即刻想搵多盒麥樂雞嚟試下。
推！真。濃郁香蕉雪條
坊間甚少 香蕉味雪條 ，有都是香蕉精而造，似足藥水味。這款雪條就以有機香蕉打成冰菓而成，蕉味極真，有如食緊雪凍的香蕉肉。口感柔滑細緻，又有奶香，勁Like！
顏色筆搽上脷
這個牌子的顏色筆， 細個成日用，出糖果都係第一次見。將一包兩支雲呢嗱味的蠟筆形硬糖弄濕，蘸上酸咪咪的車厘子、提子、橙和蘋果味糖粉，由於部分糖粉會甩色，效果就好似幫條脷油顏色一樣，幾盞鬼喎！
朱古力聯乘茶餅
吉百利招牌牛奶朱古力與英國品牌LU 小茶餅合作的出品。一盒四塊軟身的朱古力配香脆的餅乾， 口感頗有層次。而且餅乾更可以中和朱古力的甜味，加多杯熱茶或咖啡，就係一個美好的3點3下午茶。
