霸氣!!! 寧波巨人級蒸氣海鮮鍋
大桌蒸菜宴¥598/圍
呢餐海鮮蒸氣盛宴簡直可以媲美滿漢全席，由古至今都非常重視派頭嘅內地文化中，叫得係「宴」，都知道份量同種類都係以多見稱。見到以下照片，呢間餐館推出嘅蒸氣套餐絕對稱得上「宴」呢個字！呢個差唔多鋪滿一張同時可以坐滿25人大圓枱嘅套餐，相當「猛料」。入面有雞煲＋大閘蟹＋多款海鮮＋多款已加工或已烹調前小食，淨係望見張相都覺得飽呀！
唔止係網上片段，唔少食過嘅內地網民都話呢度嘅海鮮勁新鮮！正如片段中所見，未落水蒸嘅大閘蟹、瀨尿蝦、中蝦都跳跳紮，勁生猛！另有扇貝、花甲、倉魚、鮑魚等海鮮，海鮮迷睇到呢度應該流哂口水啦！
呢個套餐其實係一半海鮮，一半其他小菜嘅，鍋內亦有唔同種類嘅蔬菜，如白菜、粟米、蕃薯等畀大家消消滯！
另外，亦有燒肉、豬手等滿足一眾無肉食唔安樂嘅食客。
呢個蒸鍋其實係由店員落蓋蒸嗰刻計，要用12分鐘蒸熟加6分鐘焗熟食物，一共要等18分鐘。餐館亦有準備各式小菜畀食客喺等熟期間過口癮。
