豆柴Cafe被爆疑似虐狗 柴犬被困窄籠層層疊 店方回應：誣衊抹黑｜網絡熱話

撰文：GW｜來源：Facebook@柴犬入魂~全港愛柴同盟 (香港柴犬保存會)

豆柴Cafe狗狗被困窄籠 如積木層層疊 環境衛生惡劣

銅鑼灣「豆+柴cafe」（Mame & Shiba Cafe）於今年一月開業，店內有10隻招牌豆柴（體型較小的柴犬），因為可愛柴犬瞬間爆紅，成為人氣打卡咖啡店。但如今就被網民指控虐狗，相片中可以看到狗狗被迫關在窄籠當中，空間極為狹窄，柴犬連站立都有困難，房間環境也相當惡劣，引來網民怒轟。

前員工爆料：狗狗每日只可飲一碗水、或困籠超過14小時

在帖文留言區前員工紛紛出面爆料：「我都係呢度做過2日，但頂吾順就走。一隻成犬秋田可以放係一個3尺籠冇得走，我見到好心up。隻隻都臭到傻。飲水都吾俾飲好多，狗狗見水搶住飲，指甲隻隻長到飛起，陰公！」、「狗仔呀一日只可以飲一碗水」。

網民：該店舖疑賣近親繁殖狗狗 體質差病痛多

有網民拍下現場的相關商業登記證，公司名稱為Akita Professional Petshop，即位於旺角的「柴犬專門店」。

有網民回覆指自己曾在該店舖買柴犬：「柴犬漸漸大，問題就開始慢慢浮現，腸胃一直有問題，再發現有隱睪丸症，兩粒睪丸都要開刀拎返出黎。跟住後兩腳都有嚴重的4級菠蘿蓋移位，原因都是近親繁殖所引致。」、「我係啲間舖頭買返黎， 返黎前已有皮膚問題（店主有講），耳仔同手肘都甩毛…. 醫生開左抗生素先好返，唔知係咪就係關籠啲尿浸住搞到咁」。

前顧客：曾目擊柴犬瞓尿盤 經過聽到慘叫聲

不少網民指店舖衛生情況惡劣，狗狗的大小便沒有及時清理，更有網民貼出店內狗狗吃排泄物的影片，令人心疼又憤怒。不少網民也指曾在附近聽到狗狗的慘叫聲：「啲柴柴成日都慘吠，連樓下街都聽到，終於有人指證呢個衰人啦！」

店舖發聲明指相片失實 將交由警方及律師處理

Mame & Shiba Cafe事後在其facebook專頁發聲明指，「狗狗平時是生活在400多呎空間，只有消毒清潔及餵食的短暫時間在籠子入面，公司設有CCTV已經找出有心人，懷疑有前員工被炒，所以惡意抹黑公司，本公司將會對該名員工作出法律行動！」引網民再度怒轟，「400呎住10隻狗仲好意思咁大聲講？」不少網民要求直接公開店內CCTV，看看柴犬的日常生活，清白自有公論。