謝師宴
謝師宴

缺席謝師宴都要畀錢!細數9個唔明點解會有嘅校規

熱話

廣告

中學係唔少人嘅重要回憶,師生喺同一間學校共度六年時光,畢業之時當然要搵個機會多謝教師,所以唔少學校都會有舉行謝師宴嘅傳統。但係近日就有網民喺連登分享有關妹妹學校要搞謝師宴,不過唔出席都依然要畀錢,引來唔少網民大鬧學校規矩無稽,更令人回想起當年讀書時嘅無理校規,唔知你哋又有無共鳴呢?

撰文:Evita | 圖片:連登、劇照、Instagram

缺席謝師宴都要畀錢

話說早前有人喺連登以「阿妹今年中六,啱啱佢拎呢張謝師宴通告出黎(嚟)」為題,內文就係話阿妹拎咗張謝師宴通告畀阿爸睇,並叫阿爸畀錢,點知阿爸睇完就捉咗太太入房,成粒鐘先出嚟。

通告上見到寫住中六級將會舉辦畢業聚餐,選址為九龍香格里拉酒店,出席者嘅收費為HK$980,而缺席者都要畀HK$350,以作宴請老師同購買紀念品畀學校。

網民質疑:搞手袋好多?

有網民就話,有心多謝老師就全班每人夾$10送份禮物都已經有心,有人更質疑成千蚊一個人,當中應該有唔少係搞手落袋,亦有人認為謝師宴應該由學生搞,而唔係好似香格里拉嗰張圖咁,由老師作主辦,唔出席更唔應該要畀錢。

唔出席謝師宴但係要畀錢嘅規矩,令人諗起唔少近乎無理嘅中學校規,以下校規大家又有無共鳴呢?

1. 著校服唔可以喺街食嘢

有好多學校都認為學生應該保持清潔整齊形象,所以定下咗唔可以喺街食嘢嘅校規。不過相信有唔少同學放學後都會唔理校規,照樣著校服篤魚蛋吧!

2. 禁止與異性有近距離接觸

中學生青春期對異性有好奇係正常,有名校一直禁止任何聯校活動,原因係擔心女生同其他異性有近距離接觸,有人曾經同男親戚出街被老師目賭,就算家長解釋咗都要寫悔過書。

3.冬天必須帶「校褸」返學

校褸,一個厚重如裝甲嘅服裝。學校一般都會希望校褸款色樸素,以代表學校嘅統一性。有啲學校規則,就係無論你著定係唔著,都一定要帶校褸返學校!

4. 校裙長度很重要!量度校裙用間尺!

相信各位女生讀者都會有經驗,返到學校時被老師檢查校裙長短。一般老師嘅做法是用目測,或用手按實校裙測。嚴謹做法就係會用間尺來量度校裙長度,少0.1cm都唔得,認真要小心。

5. 夏天不可以穿冷衫

喺夏天有啲學校係唔想大家著冷衫,原因係方便老師進行校服儀容檢查。幾年前有女名校訓導姐要求學生除冷衫,原來就係想檢查同學有無著鮮艷顏色嘅內衣。

6.小息不可以放下窗簾

有啲學校是會檢查窗簾,原因係如果窗簾放低咗,老師同風紀就會見唔到同學喺班房入面做梗麼,會有潛在危險。所以學生喺落堂後,需要拉上窗簾。

7.低過10度可以穿西褲

有女校校內嘅規則,喺溫度低於10度時可以穿褲,免得生病,但一定要著標準西褲,上身就著平日校服。但一般少女都會覺得穿上後外觀奇特,所以從來未見到有同學有咁穿著。

8.不可以穿運動服上學/放學!
喺傳統學校,係唔容許你著運動服離開學校。無論你幾夜放學,練完校隊,幾咁疲累,學校門口嘅嬸嬸見到你穿運動服離開學校,你都是會被邀請去更衣室換番套校服先可以走。

9. 午飯時間不得與校外人士進食
有啲學校唔想同學同其他不良人士食飯,而有損校風。所以會安排老師企喺學校門口……「監視」。

以上幾點同你學校校規似唔似呢?你哋見過最特別或者無理嘅校規又係咩呢?