西貢某隱世沙灘無封灘可玩水仲唔怕罰錢？市民：起碼有個地方可以休息吓…｜玩樂熱話

疫情之下全港海灘遭圍封
西貢橋咀島小泳灘成為熱門景點無封灘可玩水仲唔怕罰錢？

康樂及文化事務署轄下泳灘因政府防疫措施遭到圍封，市民無法入內玩水玩沙，如果偷偷哋入去隨時被罰款！在康文署的泳灘封灘後，平時人頭湧湧的沙灘變得冷清，不過原來橋咀島上有個細泳灘原來不受康文署管轄，因此吸引了不少人紛紛約埋親朋好友前來，一同享受大自然，玩水仲唔怕被罰錢添！

橋咀島位於西貢區，係香港世界地質公園其中一部分，在2019年完成重建，如果市民想前往的話，需要從西貢碼頭轉乘街渡前往橋咀島。雖然這個沙灘面積較小，由頭行到尾大概四分鐘就行完，不過因為冇被圍封，唔少市民都出嚟親親大自然，吹吹海風玩吓沙，好愜意呢！

受訪市民表示疫情之下經常留守家中，偶爾也需要到戶外散心，特別係對小朋友身心發展都非常重要，橋咀島呢個沙灘雖然地方細，不過勝在風景怡人，海水清澈也可以讓小朋友盡情踢吓沙，放鬆吓緊繃的身心靈。

值得注意嘅係，橋咀島本身就有一個康民署管轄的橋咀泳灘，而目前仍然開放的是旁邊較小的泳灘，大家去的時候要注意唔好去錯啦！不過該處因為不是政府泳灘，所以沒有救生員當值，因此如果要進行水上活動，市民應該加倍小心注意安全，避免憾事發生。