裝修師傅將冷氣機裝入櫃　業主收貨後發現無風出急求救　網民睇圖爆笑

事主收貨後急上網求救：冷氣機出唔到風啊！

一般冷氣機會安裝在無遮擋的位置，令冷氣吹遍全屋。而事源網民於Facebook群組「家居裝修分享谷」匿名發文，指家中完成裝修後才頓時發覺冷氣機無法出風，此時才驚覺裝修師傅當時建議把冷氣機裝入櫃內，而現時天氣變熱卻無法出風，向各位網民求解決方法！

網民嘲諷：你又會接受裝修師傅呢個設計？

事主一發文即引起大熱網民熱烈討論兼瘋狂恥笑，更直指自己是否入錯「6uo 群組」，因為此設計根本不合常理，更揶揄事主是否就是當時裝修師傅，現在業主發現有問題要求重裝！網民指「其實我都幾欣賞你上嚟問嘅勇氣」、「你當時同意嗰陣係咪鬼上身？」、「就算畀設計圖你時見唔到實物諗唔到呢個情況，到冷氣機師傅裝上去嗰時都應該諗到呱」、「一定係裝咗冷氣先裝櫃，冷氣機師傅見咁樣邊會幫你搞」。也有網民指此情況非只有師傅問題，而業主同意都有責任，「就算唔係出風問題，清潔冷氣機都唔得啦，如果冷氣機漏水要維修更是難上加難」。

網民建議解決方法：拆咗個櫃咪得

有其他網民就推敲，可能當時事主或裝修師傅是想令屋企保持美觀，所以將冷氣機放入櫃，待使用時才打開櫃門，豈料將整個櫃變成大雪櫃！事主引起熱烈討論後就未有再上水分享冷氣機狀況，亦令一眾網友更好奇最後點處理。

• 叫師傅拆掂佢啦，佢可能心諗：我呢個咁正嘅設計終於有人識貨
• 師父見佢雪櫃冰格細，喺廳做多個位畀佢放凍肉啫，第日打邊爐攞凍肉方便啊
• 見唔見到冷氣機左邊有風擋？樓主可以諗住將啲風向上飛上天花板再吹返落地
• 佢表面上係一個冷氣，其實係一個雪櫃
• 其實你直接拆咗個櫃咪得

經過一陣揶揄、嘲笑，當然有專業網民提出實用建議救救事主。最直接方法就是將上半部的櫃拆掉，只保留下面的矮櫃，將冷氣機「重見天日」之餘又能夠順利出風，亦有網民叫事主今次要搵個「好少少嘅師傅」去負責拆櫃重裝。而比較環保的方法，除了找手工好的師傅外，「直程𠝹走紅色嗰Part，犧牲兩個櫃桶，𠝹口位油返白油就得啦」。