【自助餐放蛇起底組】$178放題玩3P 燒肉 x 蒸氣火鍋 x 日菜

熱話

廣告

蒸氣火鍋 近排咁hit,齋食都要百幾二百蚊,今次呢間餐廳,兩個鐘內俾你任食燒肉、日式料理,仲送多個海鮮 蒸氣火鍋 ,平日$178就有交易,哇!玩勻3樣嘢,兩個鐘夠唔夠時間食呢?立即去片!

一口和牛任食 怪味醃醬雞豬肉

燒肉係以劃紙仔形式落單,肉類有牛舌、牛仔骨、黑豚肉、豬頸肉、雞翼、羊鞍,最估唔到有「一口和牛任食」!仲有海鮮同蔬菜類,例如海中蝦、青口等,望落好豐富!落咗單之後等5分鐘都嚟齊,同埋都執啱份量。

味道嚟講,鹽燒一口和牛、孜然牛舌同羊鞍都唔錯,不過聲稱有芝士、蜜糖、香草嘅肉類就認真麻麻,唔係無味就有陣怪酸!叫咗兩轉燒肉都已經用咗一個鐘去食,得返一個鐘食題同埋蒸氣火鍋!媽~好急呀~~~轉個頭見到有枱,5個人可開兩個爐,咁就可以烤肉、蒸氣鍋同步進行,正呀~~

蒸氣火鍋
肉類、海鮮都係任叫任食。
A17
如果2-3人入座,得一個爐,要食完燒肉先可食蒸氣鍋,急唔來~
A5
鹽燒安格斯一口和牛有驚喜,入口鬆化,好嫩滑!一個人要食返十幾粒先夠!
A4
孜然美國牛舌都唔錯,好爽彈,都可以喪encore!
A6
香草紐西蘭羊鞍雖然無香草味,但都好鬆化好香口。
A7
海中蝦都好大隻、彈牙。
A8
伏嘢嚟啦!香草醬雞扒真係唔多掂,香草醬有陣奇怪嘅酸味,哇!難食到吞唔落!
A9
芝士黑豚肉其實都係上碟時放一堆芝士粉係黑豚肉上面,燒個時都好易燶,要留心~同埋食落係唔覺有芝士味嘅!另外蜜糖手羽先都係無蜜糖味!

日式料理選擇多 不過味道就……

日式放題同平時食開嘅放題一樣咁多種類,有刺身、壽司、手卷、炸物、天婦羅、和食料理等,選擇一啲都唔hea,不過正當以為可喪食刺身之際,發現三文魚無味,吞拿魚又多筋,得炸物同天婦羅好啲咋,其他真係…….

A2
同燒肉一樣,都係tick紙仔落單,選擇同平時日式放題一樣多。
A12
刺身味道就……主要係無味啦~~~~三文魚無味之餘仲有筋;油甘魚無乜魚油;吞拿魚就最伏,多筋到喊!!!
A10
帶子鵝肝壽司!鵝肝超超超細粒,好似手指尾指甲咁大,細到一入口唔知飄咗去邊。
01
天婦羅同炸物都ok嘅,都炸得香脆。
02
忌廉薯餅炸得也香口。
A11
放題少有嘅川辣雞翼尖,一入口勁辣好刺激,不過雞翼尖口感好霉好霉,我真係食咗一隻就放返低。
A3
飲品任飲,有汽水+啤酒。

蒸氣火鍋 海鮮任攞 不過……

食完燒肉,其實都可以叫店員們幫你換上蒸氣火鍋,放係底部嘅唔係清水,而係胡椒鹹菜豬肚湯;而蒸氣火鍋嘅配料係自助嘅,可以入去任夾海鮮,有海蝦、東風螺同蜆等。

A13
蒸氣火鍋同燒肉都係用同一個爐。
A18
蒸氣火鍋啲配料一眼望晒,全部都係海鮮。
A15
青口肉質霉,而且好腥!另外東風螺食落好唔新鮮,同埋太鹹!
A16
食完海鮮試下吸晒海鮮精華個湯,um……我覺得呢個唔可以叫做胡椒鹹菜豬肚湯,可以改名叫做胡椒水,都唔入味!

 

總結:雖然$178呢個價錢可以食到燒肉+蒸氣火鍋+日式放題,食法和食物選擇真係好豐富,不過味道方面就真係唔多理想,得燒肉個part可以狂encore,同埋如果要係兩個鐘裡面食勻三樣放題,真係要自己睇住時間(不過如果你多人有得坐大枱有兩個爐咁就會好啲),多半個鐘要舒服啲!環境方面都好闊落,但抽風系統似乎唔係幾work,食完都有一陣味;服務都ok,店員們都有主動執碟同上菜速度都快手。

總分:6/10 A20

板燒郎燒肉鐵板放題料理專門店

地址: 佐敦白加士街66號新寶廣場5樓全層(顯示地圖)
電話:3543 1183
放題供應時間: 5pm-2am
$178放題供應時間:星期一至四 5:30pm-6:00入座
收費:成人:$178、小童:$138
用餐時間:入座時間起計2小時
備註:收加一

延伸閱讀:

【自助餐放蛇起底組】九龍灣工業區 $118任食繁忙蒸氣鍋

【自助餐放蛇起底組】$188日式放題 自助甜品區+送生蠔