甜品
甜品

【自助餐放蛇起底組】沙田酒店Tea Buffet!$78任食紫薯朱古力甜品

熱話

廣告

食甜品做下午茶係女士們的飛佛。呢間酒店就有個$78 甜品自助餐,主題仲係人氣大熱的紫薯和甜蜜蜜的朱古力,仲有得任飲茶或咖啡,聽落好抵!即刻衝入去起佢底先。

群情洶湧 排隊入座 怒搶 甜品

這個 甜品 自助餐其實就星期一至日都有供應,時段為下午2:30到5:30,俾你坐足三粒鐘,不過閒日就抵啲,只須$78(未包加一),假日就要$108。價錢平,自然爆場啦。小編當日就揀咗星期四去放蛇試食,前一日打去Book位已經被通知要坐戶外位,當日自助餐開始入座前,門口仲出現人龍!有食客話無訂枱想walk-in,都要等5-10分鐘呀,所以溫馨提示你:記得Book位。

無呃你,真係要排隊入座,而且全部都係Ladies, 甜品 嘅魔力,唔使解釋。
無呃你,真係要排隊入座,而且全部都係Ladies, 甜品 嘅魔力,唔使解釋。

放低個袋行去睇下有咩食,發現buffet區已經人頭湧湧,一眾女士們(包括婆婆)都雙眼發光咁望住啲甜品,起勢夾滿一碟。職員和大廚們都忙住不停Refill餐碟和甜品,每次都原盤換,夠快手,抵讚。

BUFFET_D
Buffet剛開始,全部人就陷入搶 甜品 的忘我境界。

 

BUFFET_C
好彩職員們都夠快手,秒速原盤refill。

Buffet區唔算大,一邊牆身和一個吧檯就睇晒。小編數過,Keep住會密密Refill的 甜品 大約有二十款,全部的的骰骰,等你可以每款都試到。話明係紫薯同朱古力做主題,呢到過半數的 甜品 都對題,包括紫薯栗子撻、紫薯芒果千層酥、朱古力泡芙山、抹茶白朱古力忌廉蛋糕等,另外都會有芝士蛋糕、芒果布甸和果酒啫喱。最有誠意的,莫過於Live Station即製的朱古力心太軟和紫薯窩夫,新鮮熱辣辣,唔怪得個個都企定定排隊攞!

buffet16
一系列紫薯、黑朱古力、白朱古力的 甜品 任你揀

 

buffet10
即製紫薯窩夫,可以自己落手或者叫大廚幫你整。
buffet11
即製的朱古力心太軟,脹卜卜,聞落好香。

甜品款式的數量尚算合格,不過老實講,大部分的 甜品 味道只屬一般貨色。食一件,你會覺得OK,可以淺嚐,但唔會有意欲再食多件。以下這幾款就係小編認為可以Encore的款式。

紫薯窩夫

未熟之前見到淡紫色的粉漿已經覺得頗足料,新鮮出爐的窩夫切開見到紫色就仲靚,食落口感都鬆軟,略嫌紫薯味唔夠突出,亦無蛋香。好彩Toppings有得任加紫薯蓉、朱古力彩針、花生醬、煉奶等。同紫薯蓉抹在窩夫上同食,紫薯味瞬間Level Up,好香呀。

buffet7

朱古力心太軟

造型賣相好完美,中間微微凹陷就知唔會麵粉過多,一放入匙羹,朱古力就好似溶岩咁湧出黎,流心的程度可以話係100分。朱古力味濃郁又香醇,唔會過甜,口感滑溜之餘帶少量蛋糕質感,係幸福的感覺。加上當日小編坐喺涼風輕輕吹的室外座位,食完即刻覺得暖笠笠。

buffet8

紫薯栗子撻

擠花的技巧明顯有待改進,不過勝在擠得夠多,填滿整個曲奇撻皮。紫薯蓉打得夠滑夠smooth,味道香甜。撻皮有少少牛油香味,唔會太搶戲之餘,和甜甜的紫薯亦好夾。

buffet4

紫薯芒果千層酥

酥皮睇到一層層,而且口感鬆化唔死實,雖然無乜芒果味,得紫薯味,但軟滑的吉士醬和紫薯同脆卜卜的酥皮令口感好豐富。

buffet_b

同場加映!必食快閃火焰雪山 + 炸芝士蛋糕

話說咁啱想去攞杯茶,又見到buffet區排長龍!原來每日的 甜品 自助餐時段,會快閃推出火焰雪山和炸芝士蛋糕。火焰雪山仲會表演埋將酒精點燃,火燒雪山的一幕,然後就會由大廚分切,派給食客,雖然份量就真係好少,得四份一件。但有幸搶到的小編表示沾沾!不過真係講運氣,事關火焰雪山出場時,係無人通知嘅,除非你坐室內,就會見到。否則好似小編咁坐室外,真係會走寶。建議餐廳職員俾下溫馨提示會比較好。

buffet5
蛋白打得夠輕夠滑,混合雪糕及蛋糕同食,有齊冷熱的感覺和口感。

炸芝士蛋糕都是快閃黨之一,將細細件的日式芝士蛋糕和美國芝士蛋糕炸成球狀,有四款醬汁任揀,一睇竟然發現,除了士多啤梨、芒果醬等的甜味醬汁,仲有泡菜醬,嚇到小編眼都突埋。本住冒險精神為大家一試!有驚喜!聞落味道好似煎釀三寶加辣醬,食落外脆內軟,芝士味濃郁帶鹹香,配泡菜醬原來好惹味,好新奇有趣,即刻連攝影師果份都搶埋嚟食。不過都係果句,一眼關七,先會有得食。

buffet6
炸芝士蛋糕配泡菜醬原來一啲都唔伏,仲好惹味,要試!

識得捉住甜品和紫薯這些女生必冧的潮流,呢個 甜品 自助餐都算叻。不過都有美中不足的中伏位。講緊嘅就係 甜品 絕不能犯的錯誤:賣相!小編明白,平價自助餐,賣相絕不會精美到雕花,但以下這幾款,真係需要大大改善呀。

這款朱古力慕斯杯,內裡的朱古力和綿花糖無乜層次,但灑上面層的朱古力碎卻濺出杯邊,整個杯身有污漬之餘,還有很多半溶的朱古力,小編拎完都覺得痴笠笠,酒店內的 甜品 ,賣相應該不至於此吧?這一款果酒啫喱加入了雜莓粒,可惜雜莓會甩色,滲出果汁,雪凍凝固之後就好似生化武器,化學實驗感覺極濃,好驚呀。

buffet2
朱古力裝飾飛晒出界,雜莓甩色變成血染啫喱,驚!
buffet13
近看這個果酒啫喱,真係好似做緊實驗。

切件蛋糕質感頗削,用蛋糕刀一切就變形塌陷,呈半溶狀態,感覺上是解凍太耐,或者雪得唔夠凍,整件蛋糕好似比薩斜塔一樣,要扣少少分。

buffet3
白朱古力呈半溶狀態,面層仲滲出水份,雪得唔夠凍。

總結:5 / 10

試食完這個 甜品 自助餐,小編認為只屬僅僅合格。 甜品 款式總算呼應到主題,而且睇得出有花心思去諗配搭,雖然大部分的 甜品 味道一般,驚喜不大,但即製的紫薯窩夫、心太軟,期間限定的火焰雪山、炸芝士蛋糕都好有gimmick,算係有誠意。而且$78這個價錢可以任食 甜品 ,茶、咖啡都是無限任飲,確實係超抵。兼且可以讓你和朋友坐足三個鐘,歎茶、食 甜品 、傾計、hea,一次過做晒,幾寫意,環境都算幽靜,平價High-tea而言,試一次都ok嘅。

one+one Bar

地址:沙田白鶴汀街8號帝都酒店大堂(顯示地圖)

電話:2694 3869
甜品自助餐供應時間:
星期一至日及公眾假期 2:30pm – 5:30pm
收費:
星期一至五 $78/位
星期六、日及公眾假期 $108/位
備註: 收加一、收信用卡

 

延伸閱讀:
【自助餐放蛇起底組】高分!亞洲50最佳餐廳 $238泰式半Buffet
【自助餐放蛇起底組】MK日式放題 3小時有鐵板燒食