【自助餐放蛇起底組】元綠地獄加碼 $98火鍋壽司放題

熱話

廣告

我不入地獄,誰入地獄?天水圍 元綠 壽司放題洗晒版、排晒長龍,原來佢仲有$98日式火鍋放題,壽司同樣任食,即刻去片睇下地獄唔地獄!

5款湯底揀 肥牛豬肉可任食

用餐時間得90分鐘,細枱就一人一鍋,大枱就要Share。湯底有5款揀,分別是特色咖喱、長崎豬骨湯、熊本蕃茄湯、九州地獄和壽喜燒湯。我哋叫咗長崎豬骨湯和九州地獄湯,地獄湯好快到,但豬骨湯等咗15分鐘都上枱,原來漏咗落單,店員好有禮貌快手補返。

湯底上枱時,店員各拎咗2碟美國肥牛同美國豬肉俾我哋,牛肉色澤偏暗紅,但都完整大件,有少少雪花紋;豬肉望落都正常,切成薄片,一夾好易散。

02
我哋揀咗長崎豬骨湯,豬骨味好淡,只有少少鹹味;九州地獄湯底飲落似微辣的麵豉湯。
A2
美國肥牛完整大件,食落都有少少牛味嘅,脂肪肥位多,食多兩碟啦~
A3
望落正正常常,但食落口一啲豬肉味都無喎,而且嚡過紙皮。

自助區域選擇少 得15樣嘢食

出面自助區域得15款火鍋配料:蕃茄、芝士腸、蟹子丸、豆卜、翠玉瓜等,另一邊有豆腐及烏冬,超少嘢揀,大部份味道都正常,最伏是烏冬,軟淋淋到完全不用用牙咬,用條脷頂一頂就已經散開,似俾BB食的粉糰,好難食。

A4
無啦,一眼望晒,自助區得15樣嘢食。
A5
不過都放得整齊企理。
A6
一眼望晒,重有兩款菜無揀返嚟姐。
A10
烏冬完全係伏,淋到似粉糰。
A8
熟食有白飯同牛肉炒飯,雖然放在電飯煲,但都唔係熱辣辣,微暖咋。
A9
飯粒軟腍有淡淡豉油香,牛肉碎混晒入飯粒,少有大件牛肉,而且好嚡。
01
汽水有幾款揀,,可樂一按出來超泡泡,飲落無汽,似放咗萬年咁,甜到喊。

任食壽司 地獄滋味

任食壽司有兩盆,第一轉得三文魚壽司,遠睇唔覺有乜事,但近睇就出事啦!!!點解係黑色嫁?好驚呀!!!!勉強揀咗兩件正常少少嚟試,嚿飯無出事,但三文魚完全無三文魚味,一咬落去仲要散開,好唔掂!

第二輪的玉子壽司都同樣出事,睇落好乾身,但食落好甜,而且出水,太恐怖了!!!

A11
有兩盆任食壽司,頭一個鐘都只喺得三文魚。
A12
睇真啲….哇!好核特!!好核特!!好核特!點解會喺黑色嫁?痴線嫁,食咗都唔知會唔會肚痛…
A14
夾咗兩件望落正常既嚟試食,來起都無散開,師傅都握得幾實,米飯味道正常,有少少醋味。但三文魚一啲味都無,一咬落去好鬆散,超級難食!
A13
第二輪有玉子壽司,望落去塊蛋好乾,就快裂咁。但食落去有神奇的效果,濕到好似將塊蛋浸咗落糖水咁,甜到出水,救命。
02
甜品有雪糕食,是雀巢的芒果味同雲呢嗱口味。
A15
我只不過係想食下雪糕姐…但個雪糕舀用超熱水浸住,熱到一用力舀就好辣啦,放過我啦…

最後想食返個雪糕定驚,點知一拎起個雪糕舀,又出事,辣到呀媽都唔認得,雖然出發點係好,但辣到揸唔到,叫人點食呢……..

總分:3/10

放題 Sell 壽司+火鍋,但壽司得2款,而且質素超劣,起碼扣4分。火鍋來說,牛肉還可以,豬肉柴皮,蔬菜丸類選擇少,飲品和雪糕也是求其得很,食咗D壽司無肚痛都算偷笑。我情願俾多$40食XXClub,D肉靚D,蔬菜丸類粉麵選擇多D,坐得舒服D,可自己唧軟雪糕囉之餘,飲品和甜品也有多D選擇。
A16

元綠壽司

地址: 天水圍天華路33號頌富商場2期1樓128號舖(顯示地圖)
客戶服務熱線:2710 6868
天水圍分店電話:2617 2345
日式火鍋壽司放題供應時間: 星期一至四 6pm-8:30pm入座
星期五、六及公眾假期 6pm-9pm入座
收費: 成人$98、小童$78
用餐時間:入座時間起計90分鐘
備註:收加一

延伸閱讀:
【自助餐放蛇起底組】$168韓燒 炸雞小食任食
【18區掃食】 北角 搵雞 $3水牛城雞翼+百搭雞髀餐