老闆要求全公司停工齊撲MIRROR演唱會飛 打工仔揭老闆搶飛超黑暗原因

老闆要求全公司停工齊撲MIRROR演唱會飛
打工仔揭老闆搶飛超黑暗原因

MIRROR官方宣布進軍紅館，MIRROR演唱會2022《MIRROR.WE.ARE LIVE CONCERT 2022》即將在7月25日展開，一連舉行10場，鏡粉們隨即到處搶飛！近日一名打工仔投稿至「辦公室日報」，指日前某信用卡客戶可優先訂購MIRROR演唱會門票，他老闆提前一日已籲員工提早上班，因為要全公司上下一齊撲飛，仲話買到飛會「重重有賞」，他直言平時有大生意都無咁緊張。

老闆第一大「吸引」Offer

雖然公司上下有20多部電腦，但最終無人成功搶飛，而老闆要求全部員工停工搶飛的舉動可謂癱瘓公司運作，鏡粉同事更直言「睬你都傻，老細大晒呀？我自己唔使買呀？入到去我自己買唔會出聲啦！」原本以為事件會就此落幕，打工仔指老闆之後更「癲到打啲客同埋Agency嘅主意」，因為本身公司有搵廣告Agency做Campaign同宣傳，而當中幾間Agency之前都分別做過鏡仔有關的Job，所以叫他們去「R飛」，令他感覺難做。

老闆第二大「吸引」Offer

老闆更指可以應承Agency，如成功R飛的話公司可以再做一次Campaign，但就被打工仔質疑前排先話無Budget。後來Agency回覆「保錡都無飛啦，我二打六嚟㗎咋！」因為今次演唱會由某間保險公司贊助，於是老闆再周圍問人識唔識呢間保險公司的經紀，「話如果拎到飛可以將公司啲強積金轉晒過去喎…」

後來打工仔揭穿老闆搶飛的黑暗原因，他指該老闆並非女性，加上是一名中坑，對MIRROR基本上是無感，但因為他單身，「呢期溝緊條女，對方細佢10年，係姜濤fans，所以咪要用盡一切手段搶演唱會飛囉。」

來源：辦公室日報