大媽
大媽

網民:「絲巾係重點!」外國人神還原中國大媽影相十九式

熱話

廣告

相信大家不論喺港鐵站、商場門口定係旅遊景點,都會留意到內地大媽隨處擺出「妸娜多姿」嘅影相姿勢,有時見到心裡都會不禁:「嘩!」出嚟,近日就有一名外國人模仿大媽平日嘅影相Pose,完全捕捉所有神髓,大家又覺得似唔似先?

撰文:Evita |圖片:抖音

外國人神還原中國大媽影相十九式

呢位外國男人叫多多,近日就同中國女朋友大菀一齊拍攝一條「大媽式拍照」影片,影片其後喺內地社交網站爆紅,一齊嚟睇下到底有幾似啦!

第一式:坐草坪式

坐喺草地上影相嘅重點係絕對唔可以盤腳坐!一定要伸對腳出嚟,仲要係一隻直、一隻曲,咁先入型入格!

第二式:林中探頭式

睇到?睇唔到?都係睇到好!企喺樹木後面將頭伸出嚟,造出神祕感。

第三式:草坪上捧臉式

去到大草原,就梗係要同大自然融為一體啦!

第四式:指向天邊式

有無人發現永遠影相時用手指指去一邊都係唔知睇到啲咩?其實大家最注意都係個人……

第五式:微笑扶帽沿式

有時要識得善用身上每一件道具,最常被使用嘅都不外乎係太陽眼鏡同帽,輕輕拉低帽邊,可以遮蓋小部分臉部,形成細臉效果!

第六式:天下是我的式

試問有邊個唔想做一國之君?有得出去玩就點都會扮下全國都係你嘅子民,所有地方同建築都屬於你啦!

第七式:依靠石頭式

平時影相企定定無咩動作又真係悶咗啲,所以可以同環境所提供嘅嘢配合一下。

第八式:開心的跳躍式

雖然叫跳躍,但係影到張相出嚟永遠都發現相機只係捕捉到自己預備跳起或者啱啱落地嘅樣,不過從呢張相見到多多似係想表露出大媽跳唔起……

第九式:假裝看地上式

又係一招影相瘦臉方法,如果想遮住自己塊包包臉,不仿可以望地下,咁樣就有一半臉唔使表露出嚟喇!

第十式:大鵬展翅式

以下落嚟將由高級道具「絲巾」出場!多多發現好多內地大媽都會有一條絲巾傍身,影相時又可以利用絲巾擺出多款動作,就例如以下呢張。

第十一式:和樹木牽手式

有伴一齊上鏡始終無一個人咁尷尬嘅,但係若然你嘅朋友都拒絕上鏡,大媽都會選擇同樹木做朋友!

第十二式:剪刀手式

畀個V嚟先!平時我哋諗唔到有咩pose可以擺,通常都會畀個較剪手出嚟吧!

第十三式:貴妃坐姿式

唔知係咪大媽睇得太多宮廷劇,所以都會將自己代入去劇中妃子角色,喺街中見到有長櫈都會幻想成為貴妃椅。

第十四式:有姿態的聞花香式

嗱!「路邊的野花不要採」啊!然而大媽最鍾意摘花落嚟扮聞…..

第十五式:害羞遮臉式

又到絲巾出場,如果真係尷尬到唔想出樣,咪用絲巾遮住塊臉囉!

第十六式:扶小溪水式

不論啲水係唔係乾淨,大媽都好似小朋友咁鍾意玩水,真係曳!

第十七式:樹上的花更香式

「成枝樹枝都畀你搞彎晒喇!」唔知點解大媽真係好鍾意聞花!

第十八式:回眸一笑式

用絲巾蓋住頭,再露出一個含羞答答嘅微笑……

第十九式:自由飛翔式

呢個pose同大鵬展翅嗰個差唔多,總之都係想衝上雲霄啦!

不得不佩服大媽有創意嘅影相pose,但係大家記得去郊外影相一定要記得愛惜自然環境啊!

延伸閱讀:

商場驚現大媽高聲唱歌玩抖音

補習老師Alan Chan近日喺西環西寶城發現大媽出沒,出沒啫?有咩特別啊?特別就在於呢位大媽裝備十足,帶埋腳架去到電梯前拍抖音片!Alan就話:「大媽放腳架唱歌拍抖音,睇到我全身震抖。」

Alan表示14號朝早途經西寶城惠康電梯口時,見到大媽企喺燈箱前唱歌,歌聲仲喺商場內有回音,大媽唱得忙形到完全無視Alan拍片。Alan更指片段中只係大媽其中一次錄影,因為拍完後好似唔多滿意,於是又重頭再錄。

片段已獲得百幾個「嬲嬲」同二百幾個「哈哈」,有網民睇完就話唔明點解大媽要喺商場唱歌,仲問點解平時商場保安趕走派傳單嘅人又唔趕走大媽。

呢位網民表示認識片中大媽,話佢成日呼喝孫仔同工人,已經見過佢喺公眾地方唱歌好多次。

有網民提議Alan將呢條片放上抖音,或者可以幫大媽作另類宣傳?

居日公屋中國大媽狂數日本缺點

近日ViuTV節目《人住公屋 我住公屋》播出日本篇,由主持盤菜瑩子帶觀眾去到川口市「芝園團地」探索中國、日本雙方矛盾問題。今次帶大家到有40年歷史嘅日本川口市「芝園團地」,發現有一半都係中國人,隨處聽到普通話之餘又見到簡體中文告示。

盤菜瑩子訪問一位居日內地人:「呢到環境都唔錯啊!」受訪者就話:「食唔好啊!朋友又唔多,啲嘢食點同中國比啊?中國食乜有乜,有活雞、活魚,喺呢到餓又餓唔死,飽又飽唔死。」睇落呢位居日內地人唔係好滿意日本生活。

受訪者又繼續話:「返到中國,至少我有中國國籍啊!畢竟自己係中國人,有中國嘅心!」網民睇到呢到都紛紛表示:「講到咁好,點解你又唔返中國呢?」

而芝園橋樑策劃組主席,圓山王國就話有部分定居嘅中國人無做到入鄉隨俗,對日本文化同生活習慣既唔熟悉又唔適應。有住客講嘢大聲而被日本人提醒,最後竟然用暴力「解決」。

主席又話,發現公屋範圍嘅設施被寫上對內地人嘅壞話,例如「僅限日本人使用」、「中國人,滾回去」及「髒死了」等字句。睇嚟日本居民對於內地留日居民嘅處事待人去到爆煲位置。

盤菜瑩子喺片段最後提到一點:「中國人有句說話叫入鄉隨俗,你住喺人哋國家,應該知道要將垃圾分類,有啲地方唔可以隨便坐或者踎,佢哋聽唔明人哋鬧咩,呢個係最大嘅問題。」