穆斯林學者拍片教人「如何打老婆」網民紛紛鬧爆！

穆斯林學者示範如何打老婆

穆斯林學者安薩里（Abd Al-Aziz Al-KhazrajAl-Ansari）日前喺佢嘅YouTube頻道入面放上一段短片，內容係教一班穆斯林男人一個符合伊斯蘭教規條嘅打老婆方法，仲搵埋一個叫納伊夫（Nayef）嘅男仔示範。

穆斯林式體罰

安薩里喺片段入面聲稱，男人唔一定要打老婆，但佢話，男人作為一個家庭入面嘅領袖，領袖係需要有威嚴，就好似公司經理一樣；而家庭入面嘅領袖就有可能有需要懲戒自己嘅老婆，令生活重回正軌。更話丈夫要俾老婆一個「愛的懲戒」，打者愛也。

穆斯林教訓妻子三部曲 示範正確技巧

安薩里講完之後，更話教訓妻子係有「三部曲」- 第一，丈夫先作口頭警告，第二就唔俾妻子同床瞓覺，而最後一招就係體罰。之後佢仲搵埋納伊夫（Nayef）示範所謂正確技巧。佢先大聲鬧：「我話過你幾多次？我咪叫你唔可以擅自離家咩？」安薩里之後再補充，如果老婆駁咀嘅話，就要打佢手臂再繼續鬧，其後再捉住納伊夫嘅膊頭係咁大大力搖。

穆斯林無痛打法 網民鬧爆

安薩里聲稱，呢種無痛打法唔會令對方留低瘀傷或者流血，係穆斯林溫柔打人嘅真正方法。更強調，其實穆斯林係好仁慈，唔會容許男人拳打或者掌摑妻子嘅頭臉。

好多網民睇完之後都表示憤怒到極點，好多負評！認為安薩里先係應該俾人打嘅一個，更話真男人係唔會虐打女人，懦夫先會咁做；亦都有網民甚至揚言會杯葛2022年嘅卡塔爾世界盃。