ViuTV
ViuTV

破一台獨大之局!! 追新台Viu TV全攻略

熱話

廣告

雖然成日講「亞視永恆」,但始終都有大結局嘅一刻。正所謂「一雞死一雞鳴」,亞視冇咗就自然有新電視台嘅出現。

近期ViuTV開台成為大家嘅話題,之前其實係網上面已經可以睇到部分節目。但正式成為大氣電波嘅一份子,大家實想知道點先可以係電視上睇到架啦。所以我哋已經幫大家綜合咗一啲重要資訊,咁大家就可以輕輕鬆鬆咁,同屋企人一齊睇電視啦!

 

問題一:ViuTV幾時開台呀?

答:如果大家屋企有申請nowTV嘅話呢就可以快人一步啦,3月31號就搶先可以係nowTV 99台睇到佢哋嘅試播啦!咁其他冇now嘅人就要遲少少,4月6號先可以睇到。提提大家4月2號可以開始重新搜台,而ViuTV嘅台號同now既一樣,會係99台。

 

問題二:開台之後會有幾多條頻道?

答:暫時就只有一條中文頻道。但根據廣管局條例,新電視台成立一年內必須有中英文頻道各一條。所以ViuTV一定會有英文頻道,最遲都會係出年嘅3月31號成立。

 

第一大焦點:實況娛樂真人show《跟住矛盾去旅行》

 

仲記得之前ViuTV曾經喺佢哋官方facebook宣傳過嘅實況節目嗎?你仲唔記得個節目名,點都會記得林日曦同蔣麗芸隔空講「早晨」嘅!冇錯啦,第一個節目就係《跟住矛盾去旅行》啦。呢個節目會係之後嘅黃金時段播出,第一集就已經搵咗「長毛」梁國雄同立法會主席曾鈺成一齊去旅行。講到明呢個節目係兩個政見不同嘅人去旅行,當中嘅火花令「花生指數」係咁升!

 

長毛同曾鈺成拍完個節目就有冇進一步嘅火花?唔使講都知有啦!就係琴日對「網絡23條」嘅審議果陣,當時「長毛」以之前節目同曾鈺成一齊去旅行嘅情形,來比喻網絡23條,而曾鈺成繼續皺眉回應。最後有議員提出點人數時,有其他議員笑「等長毛冷靜下先」。

第二大焦點:至in韓劇《太陽的後裔》

喺節目表見到外購劇表上有《太陽的後裔》?你冇睇錯!喺韓國都係啱啱開始首播,香港已經有得睇啦。除咗買劇方面追得韓流夠貼之外,開台之後差唔多晚晚都可以睇到宋慧喬同宋仲基嘅影子,絕對係迷上OPPA嘅褔音!

 

第三大焦點:每月直播一場西甲賽事+精華重溫

平時睇波都係喺收費電視台先有得睇,免費台大多數都係得賽後精華睇。ViuTV將會開台後每個月直播一場西甲賽事,同時逢星期一晚播出賽事精華。

 

一個電視台如果成日播返以前嘅節目,甚至連煙花匯演都可以重播,搞到個個晒咀!之前發佈會ViuTV表示喺時間表方面,編排參考日本及美國電視頻道嘅編排,會係黃金時段播放 6.5 小時首播節目,同時亦唔會成個星期都係喺黃金時間播放同一套節目。

話明係黃金時間,一定會有劇集嘅出現。以為新電視台搵唔到人拍劇只可靠外購劇?咁你就大錯特錯啦!之前放咗上ViuTV官網嘅《瑪嘉烈與大衛》已經係其中一套本地劇啦!之後全新一輯仲搵埋林保怡同周嘉儀去演出添!之後更有盧海鵬主演嘅處境劇《三一如三》。

 

外購劇絕對會是另一個焦點!相比起大台買嘅外購劇永遠都遲咗成年先播出,ViuTV就冇咁嚴重啦!頭先上頁講到嘅《太陽的後裔》會係其中一套,同時間之前喺日本大熱嘅《民王》都喺節目表上出現。發佈會上講到明所有外購劇集都會有繁體字幕同廣東話配音,咁就唔使睇估估下啦!

 

之前有睇數碼暴龍tri嘅,都知道ViuTV喺動畫呢方面落重注。會上提到未來會播放《海賊王》之餘,更有之前大熱嘅《一拳超人》同其他動漫作品,照顧咁多位動漫迷。

最新吃喝玩樂資訊