必試新鮮手打闊麵火炭 5大隱秘餐廳 |掃街王

Apr 22 2016

放假都係想輕鬆吓，冇錢去旅行但又想去d少人嘅地方輕鬆抖一抖，不妨考慮入新界區。今次掃街王帶大家到火炭工業區搵美食，有手打闊麵、超治癒花茶、教你DIY卡通熱香餅、同平價All Day Breakfast等等，呢5間隱秘餐廳環境都好舒適，令你可以將煩惱一一拋諸腦後！

1.每日新鮮即製手打闊麵 +奇味汽水

新店Stand Up Pasta於火炭開業未到一個月，已經有唔少打工仔嚟幫襯，呢度仲可以立食，畀成日坐office的打工仔「運動」吓。店舖由一位酒店廚師和曾於中環煮私房菜十多年的廚師打理，希望客人可以以火炭價錢，品嚐中環美食。
手打意大利闊麵因為製作需時，由麵團變做麵條要用半日時間去預備，因此每日限量20份，而且只有中午12點至3點先供應。餐牌每星期都會有不同，記者試了西班牙黑毛豬手打意大利闊麵，麵條爽口，而且不會黏在一起，番茄味清新，更有少許芝士，令番茄味更突出，以為細細盒唔夠飽，但其實好足料好飽肚。

每個午餐都包餐湯或咖啡，餐湯亦會每2至3日會轉一款。手打牛肝菌野菌湯，牛肝菌味濃，湯內更有野菌碎，口感非常豐富。

西班牙黑毛豬手打意大利闊麵 $68（包餐湯或咖啡）

火炭_Stand Up Pasta_西班牙黑毛豬手打意大利闊麵 — 手打闊麵夠爽口，而且麵條不會黏在一起，番茄味清新，黑毛豬肉質彈牙，足料又飽肚。

意式欖油辣蒜片配⼤⻁蝦天使麵 $78（包餐湯或咖啡）

火炭_Stand Up Pasta_意式欖油辣蒜片配大虎蝦天使麵 — 天使麵條幼細煙韌，大虎蝦新鮮夠大隻，蒜香味重，十分惹味。

露筍自家香草醬意大利飯 $68（包餐湯或咖啡）

火炭_Stand Up Pasta_露荀自家香草醬意大利飯 — 每星期都會推出一款素食，露筍意大利飯配自家調配香草醬，謝絕味精，夠健康。

英國奇味汽水 $20/支

呢度仲有好多來自英國國飲品，味道非常奇特，鍾意試新嘢的朋友可以挑戰吓。蒲公英牛蒡汽水，味道像京都念慈菴加可樂，非常特別。而玫瑰味檸檬汁，比普通檸檬汁甜，有淡淡玫瑰味，但甜度剛剛好。

火炭_Stand Up Pasta_英國汽水 — 由左至右：檸檬汁、古法可樂、玫瑰味檸檬汁和蒲公英牛蒡汽水

英國果汁 $18

火炭_Stand Up Pasta_英國果汁 — 午餐可以加$10配果汁或汽水。
（由左至右：蕃茄汁、梨汁、接骨木花汁汽水、草莓檸檬汽水）

Stand Up Pasta
地址：火炭山尾街19-25號宇宙工業中心地下D1舖（顯示地圖）
營業時間：星期一至六 10:30-17:00；星期日休息
電話：2191 0128

2. 教你DIY卡通熱香餅

早前有介紹過，呢間Lov Lov Coffee推出平民價學拉花咖啡，宜家仲有得自製卡通熱香餅，想整咩公仔都得，整完仲可以好好品嚐自己嘅作品，畀忙碌都市人嚟到輕鬆吓、減減壓。

唔想食熱香餅，仲可以試整鯛⿂燒和3D立體公仔咖啡，鯛⿂燒有朱古力同芝士兩款口味，而咖啡可自選鮮奶咖啡、牛奶朱古力、綠茶鮮奶和紫薯鮮奶4款口味。店主仲會好用心教你每一個步驟，非常細心。

玩完一輪仲可以留喺度慢慢歎，兩位店主都非常好客，而且環境舒服，食吓嘢傾吓計，一流！

⾃製雪糕卡通熱香餅$58

自製雪糕鯛⿂燒 $55

火炭_笠笠咖啡_自製雪糕鯛魚燒 — 鯛⿂燒製作過程比較簡單易學。鍾意食甜d可以選擇朱古力味，芝士味則比較淡。

自製3D立體公仔咖啡 $65

火炭_笠笠咖啡_自製3D立體公仔咖啡 — 3D立體公仔咖啡製作時要非常專心，因為畫公仔步驟十分仔細。紫薯鮮奶由新鮮紫薯製成，紫薯味非常濃郁，味道不太甜。

Lov Lov Coffee
地址：火炭坳背灣街41-43號安華工業大廈4B室（顯示地圖）
電話：94683617
營業時間：星期一至三：10:30-6:30pm；星期五：12-8pm；星期六、日及公眾假期：12-5pm
Facebook：http://www.facebook.com/lovlovcoffeestorepage

3.少女最愛超治癒癒花茶

行到入嚟呢間瑜茶舍，望到以白色為主、簡約純樸的設計，空間感非常大，已經有一種遠離繁囂的感覺，非常舒服，慢慢飲返杯茶，成個人即刻放鬆哂。

呢度茶的種類很多，女生可以揀茉莉金花茶，因為可以望住茉莉金花慢慢喺水中開花，非常治癒，而且味道帶點甘香，聞到淡淡花香仲可以鬆弛神經。如果諗唔到飲咩茶，店主要拎各種茶葉為你一一介紹講解，視乎你的口味，睇你適合飲咩茶。

以免太逼太焗促，茶舍最多只能容納16人，店主指假日比較多人嚟，經常滿坐，有時更會舉行茗茶會，所以都要睇你嘅彩數喇。

茉莉金花茶 $65/位

火炭_瑜茶舍_茉莉金花茶 — 茉莉金花由人手束成，金黃色茶湯帶點甘香，更聞到淡淡花香，有助鬆弛神經，而呢款茶只可以沖一次，因為加水會將花沖散。

生普洱 $85/位

火炭_瑜茶舍_生普洱 — 生普洱比大家在茶樓飲開的普洱茶湯顏色較淡，味道亦不算濃，易入口，有少許苦澀。

白牡丹連茶點 $130／位

火炭_瑜茶舍_白牡丹 — 白牡丹屬白茶，淡金黃色茶湯，清醇微甜帶花香。而茶點包括秋葵、紅棗合桃和杏仁酥。

中國茶 x 西餅

茶舍每個周末都會同不同餅店crossover，上星期有綠茶糯米糍仙人掌蛋糕，非常受歡迎，想知會有咩蛋糕就要留意佢哋facebook page喇。

買茶葉返去慢慢再嘆過

飲完茶想再回味，可以另外買茶葉返屋企，一盒茶葉價錢由$98至$300不等，而茶餅價錢由幾百元至幾千元，視乎你想要邊款茶葉。

瑜茶舍
地址：火炭坳背灣街33-35號世紀工業中心14樓B室（顯示地圖）
營業時間：星期一至日 11:00-18:00
電話：2359 3988

4.性價比高All Day Breakfast

平時出街食個All Day Breakfast閒閒哋都要$100，拾悦咖啡嘅全餐$80有找，仲包你凍飲一杯，味道絕對唔伏，仲有驚喜添！All Day Breakfast一共有5款，可以按照自己饑餓程度去選擇，最豐富有8款食物，有沙律、野菌牛乳滑蛋、香草雞扒、火腿、煙肉、雞肉香腸、茄汁豆和牛角酥。炒蛋做得最出色，蛋夠香而且炒得非常滑，雞扒肉質嫩滑，夠入味，煙肉肥瘦剛好，亦都好juicy。但要留意，All Day Breakfast只在每日下午3點3至6點供應。另外，店舖可以單點牛角酥，可配牛乳滑蛋煙肉、吞拿魚洋蔥沙律、牛乳鹹牛肉滑蛋、煙三文魚、巴馬火腿，連雪糕都有。記者當日去到已經賣哂，可想而知呢度嘅牛角酥係幾受歡迎。