港媽不滿85折的士遲到串爆的士司機！一句遭反駁𤓓爆收聲｜網絡熱話

港媽不滿司機遲到 司機態度倔強

影片長近2分半鐘，影片顯示事發時間為7日早上近11時左右，車程由麗港城25座去沙田帝都酒店。影片一開始，港媽照顧小朋友上車，司機向港媽確認目的地後便開車，未幾，港媽一句質問司機：「師傅，你遲咗好多喎！」

司機立刻反問：「咁你仲要唔要呀？」港媽回答：「咁我都上咗車啦！」司機即回：「咁咪係囉」港媽語氣不滿：「咁你講啲時間係（代表）咩呢？又話6、7分鐘？！」司機即回：「嗱，小姐，我唔係要被你教訓，如果你認為有問題，你可以投訴，但我唔係畀你鬧，我唔係你個細路，如果你認為我遲咗你可以投訴我。」此時隱約聽到港媽輕聲說：「OK」。

港媽氣憤要求道歉成導火線

司機得勢不饒人，但亦可能怕提供服務後被「走數」，「咁我問多你一次，你要唔要車？」港媽又按捺不住發火：「你而家拖咗我咁耐時間點解我唔要呢？」司機又不滿地反問：「係嘞，咁你鬧咩嘢呢？！」港媽見狀又稍為收歛語氣：「我第一句話你做咩咁耐之嘛，咁樣啫！」

司機：「即係你覺得咁樣同人講嘢無問題啦」，港媽不禁問：「你遲咗咁你唔係應該同我道歉咩？」這一句再次焫著司機：「我點解要同你道歉？我唔同你道歉，你係咪報警呀？」港媽：「你係咪想呀？」司機：「你咪報囉！」

港媽進退失據欠下台階卻不欲搞大件事

港媽似乎不想搞大事情之餘但氣也難下：「一係你而家畀我落車」隨即欲開車門下車，卻因在禁區，司機打算轉彎後讓她們下車，轉彎後司機再一次確認：「你係咪要喺度落車？」港媽確認後，司機即道：「係呀嘛，係就27蚊！」港媽隨拒絕：「唔得！」

司機：「唔得呀嘛，報警啦！」港媽口窒說：「咁你同我照去帝都啦！」司機見狀乘勢反擊：「同我玩？自己諗吓邊個鬧人先啦，遲就唔係特登玩你，（此時港媽亦回「你好喇喎！」）我夠想快，你心情唔好揾人發洩！」影片沒有交待最終有否到達目的地。

網民意見兩極

網民意見兩極，一部份人認為港媽自取其辱，「呢個女人態度好差，咁叻點解冇請私人司機？」、「call85折的士攞著數，仲想點？」、「原來大家對發脾氣嘅定義，都幾廣闊下」、「大嬸又話落車又話報警又話照去，應該個腦轉唔切」。

另一邊，亦有網民認為司機態度囂張跋扈，「遲咗講聲好應份，點知你幾時到」、「司機一開始道歉就問題解決」、「以後返工返學遲到就識答啦：你估我想㗎？！我夠想早啦！」。

資料來源：FB@扮工室Online