東方昇挑戰街頭$50脫墨　大媽「胸湧」用大陸激光機　最後粒墨變成咁

東方昇勇試街頭$50大媽脫墨　奮身「胸」襲笑到收唔到聲

東方昇一向為了拍節目而唔錫身，最新一集「國家級任務」中，他就勇闖街頭的臨時美容院，當街當巷就地「脫墨」。他表示自己唇上有兩粒對稱的小黑痣，配合自己的嘴唇後與娃娃魚近乎一模一樣，因此他決定幫襯街頭的臨時美容院，以超低價錢「幾十蚊」還原靚靚。他步入「美容院」後，即時有一位操內地口音的大媽上前介紹，不但直指兩粒墨「影響你靚仔」，更嘗試以墨睇相，揚言從這兩粒墨可以看出東方昇是一個「鍾意講嘢」的人。

性感大媽瞓身服務　脫走一粒墨盛惠50蚊

隨後東方昇正式入內準備脫墨，「胸」前盛放的白衣大媽先在墨的位置塗上用作紓緩的膏（不知名藥膏）。不過，東方昇比起快將脫墨的緊張，反而因為大媽「貼得太埋」而十分尷尬，只因大媽身材不俗，而且在搽膏時與東方昇靠得極近，胸前與東方昇的頭部僅幾米距離，名副其實「瞓身服務」，大媽更被哄得「笑到合唔埋口」。

大媽取出一部疑似淘寶價值人民幣98元的脫墨機進行脫墨，而東方昇則表示脫的過程中「聞到陣燶味」，一看之下發現果真「無咗粒墨」，最後脫墨價錢盛惠50蚊，不過因為大媽好口想要「小費」，所以東方昇最後加碼10蚊，以60蚊成功脫走一粒墨走人。

衛生成疑責任難究　網民：無事係好彩

東方昇在脫完後幾乎即時看到效果，脫走兩粒對稱墨其中一粒的他能夠即時對比兩粒的顏色，可見經過大媽一番操作後，脫走的一粒的確淺色了許多。不過，他就表示這類「美容院」其實衛生成疑，加上他們大多短租臨時舖，基本上幾日就轉一次手，若然真的出了事，亦難以找到人負責任。事後東方昇再到上址，對方店舖已消失，因而提醒大家勿輕易嘗試。而網民亦同意幫襯這種店舖無疑是「攞自己嚟較飛」、「隨時毀容」、「唔知啲嘢有無洗過」，更揚言「無事只係好彩」、「笑死，得東方昇敢做」、「東方昇好有大媽緣，不如殺入大媽市場」。