杜汶澤召網友投稿：一次喺戲院最難捱嘅經歷！劇透、踢櫈已經好濕碎！

「杜汶澤喱騷」召網友投稿：一次喺戲院最難捱嘅經歷！

01 ｜戲院內食嘢超誇張

在戲院食爆谷、飲汽水當然無問題，不過相信好多人都試過帶其他食物入戲院食，有網民指見過有人食牛肉飯、咖哩雞飯、龜苓膏等，「睇睇下發覺前面有啲煙」，大呻超驚嚇！「應該都有成十五年前，有次入戲院睇動畫電影，睇睇下發覺前面有啲煙，之前坐前少少睇，原來佢食緊吉X家牛肉飯」、「有條友仔喺後面食咖哩雞飯，仲要開埋可樂噴到我成個背脊都係」、「坐我隔離的觀眾食龜苓膏，戲院裡面好黑，龜苓膏又黑，我初初唔知佢食乜，之後我聞到有陣苦味我先知」。

02 ｜隔離不斷發出聲音

有些觀眾會睇到某個劇情時，無端端發出聲音，相當滋擾。「最近睇黑豹二，隔離坐咗個大媽，無論發生啲乜嘢劇情或者有啲乜嘢事，就會哎呀！加加埋埋成齣戲聽咗70幾個哎呀」、「睇全場80%都係細路嘅場次，而有人睇第2次，有個細路做聲音導航」、「睇套恐怖片，後面條仔全程發出疑似呻吟聲！一路去到部戲高潮位，佢驚到呻吟出高潮咁嘅聲！」。

03 ｜被前面座位的人遮擋視線

有網民指試過前面坐了一個爆炸頭的觀眾，全程被他遮擋視線，「喺舊式戲院，啲位仲係平排，前面坐咗兩個超爆炸頭，完全遮住哂」、「細個去過一間戲院啲櫈全部一樣高，咁啱前面座咗個又高又大隻叔叔，佢又會同佢隔離嗰個講嘢，結果成套戲大多數時間，只係睇到個mon嘅上半部，睇完重要頸痛」。

04 ｜用手機兼開閃光燈

有網民指之前見到坐前排的三個少女，無端端用閃光燈自拍，「仲要用閃光燈，瞬間閃過一道強烈白光，所有觀眾隻眼都開唔返，全部駡聲四起，冇人睇戲」。

05 ｜被踢椅背

在戲院坐太耐都會伸展一下手腳，不過被人狂踢椅背真的超困擾！「後面條友不停用佢對膝頭哥頂你背脊」、「最難頂最難捱一定係後面有人用脚踢我頭髮同背脊 ， 唔該腳長人士唔好翹腳去踢前座，做人要有公德心」、「睇恐怖片後面嘅人除咗尖叫仲狂踢我椅背」。

06｜情侶纏綿

不少情侶拍拖都會去睇戲，有網民就遇到非常纏綿的情侶：「隔離對痴情男女馨馨我我咁，條女全程用BB聲讀字幕，條仔不斷贊佢話BB聲好可愛」、「前面瘋狂打茄輪」、「喺同一行嘅男女，（同我隔左8個位，中間無人）入場已經見到兩個人坐一個位，公主抱式坐法，成套戲都聽到有打車輪、呻吟聲同『水』聲，而嗰套唔係三級片」，更有網民試過「搵座時踩到攤白色滑潺潺嘅嘢」，實在嘔心。

07｜睇戲睇到分手

「最難忘的經歷應該是和前度睇鐵達尼時她睇到哭了，因她當時哭得很大聲導致全場連同我在內都大聲笑了出來，結果最後她嬲咗我嬲到直接罵分手了」。