急口令
急口令

急口令挑戰!30個廣東話難/中/易難度!Party必備笑爆肚|網絡熱話

熱話

廣告

廣東話急口令一向是男女老幼都喜愛的簡單遊戲, 將聲調發音相似的文字編成難讀的句子,要讀得夠快而且讀音夠準確絕對不容易,一文有齊30個廣東話急口令挑戰大全, 分為初級、 中級及地獄級難度,快啲Save低下次同朋友一齊挑戰!

30個廣東話急口令:初級

初級是較經典的廣東話急口令, 適合小朋友與家長互動一起玩, 有趣味的同時可以訓練他們的讀音及訓練咬字,立即試試入門版!

急口令 立即試試初級廣東話急口令!
立即試試初級廣東話急口令!(圖片來源:《旺角卡門》 電影截圖)

1. 郵差叔叔送信純熟迅速送出。
2. 黐線蜘蛛啲蜘蛛絲黐住枝樹枝。
3. 入實驗室撳十個緊急掣。
4. 麥當娜約左麥當雄去麥當勞道個間麥當勞,食麥皮撈當歸。
5. 床腳撞牆角,牆角撞床角,你話床角撞牆角定牆角撞床腳!
6. 抱着灰雞上飛機,飛機起飛,灰雞要飛。
7. 各個國家有各個國家嘅國歌。
8. 姨媽而家去宜家傢俬,買而家岩用既宜家傢俬。
9. 搵隻斑馬同個班長。跟住班長騎住斑馬,去頒獎台頒獎章。
10. Siri施施然揭開獅子上嘅蜘蛛絲。
11.肯德龜同肯德雞去肯德基食肯德基最出名既巴辣香雞。
12.獅子長蝨子,蝨子咬獅子,獅子抓蝨子,蝨子躲獅子。

13.雞龜骨滾羹。
14. 大媽執到個瓜,細媽拎住扎花,大媽讚細媽扎花,細媽要大媽個瓜。
15.東家有隻羊,中家有棟牆,東家隻羊撞到中家棟牆,中家棟牆撞死東家隻羊,東家要中家賠羊,中家要東家賠牆。

30個廣東話急口令:中級

中級比較有挑戰性, 句子結構也比較複雜而且冗長, 相信對於口齒伶俐的你,應該沒有難度吧?

急口令 中級也相信難不到你吧!
中級也相信難不到你吧!(圖片來源: 《The great gatsby》 電影截圖)

16. 一蚊一隻龜,七蚊一斤雞,硪話一蚊一隻龜貴過七蚊一斤雞,佢話七蚊一斤雞貴過一蚊一隻龜,咁究竟系一蚊一隻龜貴過七蚊一斤雞定係七蚊一斤雞貴過一蚊一隻龜
17. 潘宏彬祝文君去搬雲吞,祝文君跟潘宏彬去橫濱,潘宏彬同祝文君一齊去紋身,紋枝人參枝參有崩。
18. 阿里媽媽去買衣架,買唔到衣架買衫架,買唔到衫架好丟架!理佢係真定係假?
19. 獅子山上獅山寺,山寺門前四獅子。山寺是禪寺,獅子是石獅。獅子看守獅山寺,禪寺保護石獅子。
20. 駱老伯,郭老伯,華老伯,柏老伯,駱、郭、華、柏四老伯,約著城北買菱角。買得菱角閣上剝,各剝各,各吃各,閣角莫落菱角殼,免得戳了駱、郭、華、柏四老伯我腳。

21. 郭藹明見過郭可盈,話郭可盈個袋型,郭可盈叫郭藹明過海改個袋型,改成郭可盈袋個袋型。
22. 一隻馬騮仔帶一群馬騮仔去溝仔,一群馬騮仔跌落溝渠底,一隻馬騮仔轉去提鈎仔,來釣馬騮仔。
23. 掘柑掘桔掘金桔,掘雞掘骨掘根骨,掘完根骨掘金桔,掘完鬼骨輪雞骨。
24. 財政司叫邰正宵做財政司,邰正宵叫財政司攞台證先,財政司話俾邰正宵知,要攞台證先要搞掂財政先。
25. 苦榮呼喚傅穎,傅穎呼喚苦榮,苦榮與傅穎唱枯榮,傅穎負評苦榮枯榮。

30個廣東話急口令:地獄級

輕鬆玩完初級及中級?就是時候挑戰一下地獄級難度的急口令! 每段文字相當「拗口」, 隨時讀到口窒窒, 捉緊計時器, 倒數準備開始啦!

華仔曾經在電影《江湖》中說過這句經典台詞, 字句「拗口」得來又好像帶有一點意思,記得當年不少人的手機鈴聲也是用這句的。

急口令 《江湖》急口令
《江湖》急口令(圖片來源:《江湖》電影截圖)

26. 《江湖》急口令全文:
講你又唔聽,聽你又唔明,明你又唔做,做你又做錯,錯你又唔認,認你又唔改,改你又唔服,唔服又唔講。

當年財經直播中林芷彤在15秒之中讀出139個字,極速讀出財經免責聲明,過程中沒有「食螺絲」 , 當時這個神技令網友噴噴稱奇,更截取片段放於網上公開!

急口令 免責聲明急口令!
免責聲明急口令!(圖片來源:Charles@YouTube)

27. 免責聲明急口令全文:
以上嘉賓係金管局同証監會嘅持牌人以上談及過嘅結構性產品並無抵押品如果發行人三個月無力償債或違法投資者可能無法收回部份或全部應收款項。結構性產品嘅價格可以急升可以急跌投資者或會蒙受投資嘅全盤損失,而過表現並非未來表現嘅指標,所以投資前呢請參讀上市公司嘅文件作出風險評估,同埋尋求專家嘅意見。

相信不少人都有睇過麥兜的卡通片,它的趣味港式對白至今仍然為人津津樂道, 這段麥兜睇醫生的急口令, 相信會讀到你口齒不清!

急口令 麥兜睇醫生急口令!
麥兜睇醫生急口令!(圖片來源:《麥兜菠蘿油王子》電影截圖)

28. 麥兜睇醫生急口令全文:
仲有呢?仲有小兒驚風外感、發冷、無名腫毒、外傷、骨折、四時感冒、腰酸、背痛、小便不暢、脂肪積聚、性慾減退、大頸泡、大眼肚咁囉!仲有冇呀?仲有嗰啲皮膚痕癢、精神緊張、健忘、失眠、暗瘡、頭皮、飛滋、小腸氣、腎水不足、頭暈、耳鳴、口乾、舌燥、生蛇、生鱔、屁股生瘡、尿頻、雞眼、胃酸過多、膽固醇過高、吐血、嘔奶、鼻塞塞嗰啲囉!

當年張衞健飾演的孫悟空深入民心, 家家戶戶都忘記不了他那句經典台詞,根據網民計算所指,張衞健16秒便讀出116個字,真的「型到跌渣!」

急口令 孫悟空急口令!
孫悟空急口令!(圖片來源:《齊天大聖孫悟空》截圖)

29. 孫悟空急口令全文:
我係,如來佛祖、玉皇大帝、觀音菩薩、指定取西經特派使者、花果山、水簾洞、美猴王、齊天大聖孫悟空呀!型到跌渣!涼風有信,秋月無邊,虧我思嬌嘅情緒,好比度日如年,雖則我唔係玉樹臨風,瀟灑倜儻,但我有廣闊嘅胸襟,加強勁嘅臂彎。我攀過的斜坡已經太多太多壯膽記得唱歌咪講咁多放馬過嚟!

周星馳的電影也為人熟悉,在《唐伯虎點秋香》中,他的對聯決戰也令人印象深刻。

急口令 《唐伯虎點秋香》急口令!
《唐伯虎點秋香》急口令!(圖片來源:《唐伯虎點秋香》電影截圖)

《30.唐伯虎點秋香》急口令全文:
對穿祥:一鄉二里共三夫子,不識四書五經六義,竟敢教七八九子, 十分大膽!
唐伯虎:十室九貧,湊得八兩七錢六分五毫四厘,尚且三心二意,一等下流!

初級難度急口令挑戰有什麼?

「郵差叔叔送信純熟迅速送出」;「黐線蜘蛛啲蜘蛛絲黐住枝樹枝。」…….詳情按此。

孫悟空急口令全文?

「我係,如來佛祖、玉皇大帝、觀音菩薩、指定取西經特派使者、花果山、水簾洞、美猴王、齊天大聖孫悟空呀!型到跌渣!涼風有信,秋月無邊,虧我思嬌嘅情緒,好比度日如年,雖則……….詳情按此。

圖片來源:《旺角卡門》 電影截圖、《The great gatsby》 電影截圖、Charles@YouTube、《麥兜菠蘿油王子》電影截圖、《齊天大聖孫悟空》截圖、《江湖》電影截圖、《唐伯虎點秋香》電影截圖