屯門山景邨高空擲物伯伯掟屎落街 《東張西望》追查擲物狂徒！2年無王管 原來有苦衷？｜網絡熱話

撰文：LC｜資料及圖片來源：《東張西望》

屯門山景邨景福樓高空掟屎案

屯門山景邨之前以衛生環境惡劣出名，是次《東張西望》報導高空掟屎案，又一次引起譁然。事緣受害者葉先生踩電單車返屋企經景富樓的時候，突然天降「甘露」，一包糞便正中他的頭部及他的電單車。雖然他事後向警方報案，但都捉唔到人，這才決定主動緝兇，並向《東張西望》報料。

12日掟24次屎彈、廚餘同玻璃樽

經追查後，發現高空擲物的行兇者係一個約70歲的伯伯，高空擲物史已經超過2年。追查嘅過程中，葉先生紀錄下狂徒的擲物時間及物件，短短11日就掟咗24次「兇器」，包括用濕報紙包起嘅屎彈、廚餘同玻璃樽！此類物品掟落街後，衝擊力和殺傷力都威力強勁。先前仲有個後生仔被玻璃樽擲中手，入咗7日醫院啊！

鄰居住屋被他搞到苦不堪言，落樓下都要小心翼翼生怕中招。最可憐是清潔姐姐，日日都要大洗景富樓樓下地面，想到清洗糞便廚餘的過程，她向《東張西望》表示：真係連飯都想嘔出嚟啊！

景富樓是居屋，房屋署無權力處理，唯有圍封景富樓附近，防止路人經過「狂徒擲物區」，然而業主唔做嘢，報警又無果，又難怪葉先生決定要主動追查啦。

高空擲物超過2年原來有苦衷

但原來伯伯高空擲物是有苦衷，原本景富樓樓下會經過唔少電單車，三更半夜發出的摩打聲令伯伯無法入睡，報警又解決唔到問題，最後他先決定要掟屎去防止電單車路過。佢透露，警察已經搵到佢，佢都已認罪，現正保釋候審中，佢表示以後都唔會再高空擲物！

高空擲物可罰款$10,000及監禁六個月

在香港，高空擲物屬刑事罪行。根據《簡易程序治罪條例》(香港法律第228章)第4B條，如果高空擲物對附近的人造成危險及損傷，即屬犯罪，可處罰款$10,000及監禁6個月！如果在公共屋邨高空擲物，可以即扣15分，兩年內扣16分就連屋都無得再住。為人為己，無論是甚麼原因，高空擲物的惡行真係唔做得！

撰文：LC｜圖片及資料來源：《東張西望》2020.10.04 – 提防屋邨「中頭獎」