女生買寫字機器人幫做新年功課 兩日完成所有抄寫作業
廣告
學生哥除咗怕測驗考試同見家長之外，最驚就一定非做功課莫屬。每逢放長假，學校都必定畀大一堆假期功課學生做，以免學生掛住玩荒廢學業。啱啱嘅農曆新年假，有學生因為唔想做功課絞盡腦汁，最終畀佢成功兩日內完成所有功課！
撰文：Evita | 圖片：淘寶
女生買寫字機器人幫做新年功課
黑龍江省哈爾濱市一名中三女學生，因為唔想做假期功課，居然花咗800幾蚊人民幣（約940港元）利是錢，喺淘寶買咗部聲稱「可以模仿各種筆迹抄寫文字」嘅「寫字機器人」幫忙做功課。
呢名女學生喺新年假期有好多功課，包括抄課文、作文、背單詞同做數學練習卷等，而佢嘅媽媽日就訂好「寒假作業計劃」，目標係喺2月24號前完成所有功課，點知喺2月13號時，媽媽就發現個女竟然用兩日就做好晒抄課文嘅功課，仲要無錯別字添！
點知媽媽之後幫個女執房時就發現「寫字機器人」包裝盒，於是馬上追問阿女，最後阿女承認事件，嬲到阿媽掟爛呢部咁偉大嘅發明！
原來淘寶真係咩都有，只要搜尋「寫字機器人」，就即刻出咗各款產品，價格由85至2300人民幣不等，寫明可以繪畫、激光雕刻、書寫等功能。
有網店表示顧客可以用手機APP做屬於自己嘅字體，軟件支持word同excel檔案導入，仲識得自動排版同分頁。每分鐘寫到30至40個字，更會隨機字體、變形，務求令效果更逼真。
同一個字都可以寫到外觀唔一樣，以製造更逼真嘅「人手書寫」。
畫圖都一樣得，得咗！
有網店向內地傳媒表示，其實機器人喺字體大小同間距都比較劃一，但係真人書寫就難以捉摸，所以仔細觀察都係會發現當中端倪。
