網民列4點力數港人睇周國賢演唱會行為低質：開手機燈、狂尖叫｜玩樂熱話

Sep 6 2022

周國賢演唱會日前完美落幕，期間更在台上分享私生活時不禁流下男兒淚，令觀眾們心都酸一酸。不過正當台上分享心酸經歷時，台下部分觀眾的行為令同場人士大為不滿。有人於討論區力數港人4大低質行為，不過卻引來反擊，其他網民指「係咪要考埋證書先有資格睇演唱會」。

周國賢演唱會觀眾狠批港人行為低質　力數4大睇騷劣評行為：外國唔會咁

演唱會飛在香港一票難求，想要一張入場票「爭崩頭」都未必得到，不過有時幾經辛苦才撲到一張門票，但最後被現場人士破壞心情，確實會非常不忿，而周國賢演唱會正發生不快事件。Endy花了18年時間，終於有屬於自己的紅館騷，不過網民看完騷後，在討論區以「香港人睇演唱會文化真係好差」為題，指香港人與外國人「無得比」，港人看演唱會只會「自High」而不理台上表演者或其他在場人士感受，力數4大低質行為。

周國賢演唱會周國賢演唱會周國賢舞台設計簡單，靠周國賢落力自彈自唱，亦帶出hyper氣氛。 — 舞台設計簡單，靠周國賢落力自彈自唱，亦帶出hyper氣氛。（圖片來源：Facebook@周國賢）

周國賢演唱會周國賢演唱會周國賢出道近廿年，先可以首嚐紅館開個唱滋味。 — 出道近廿年，先可以首嚐紅館開個唱滋味。（圖片來源：Facebook@周國賢）

低質行為一：係咪都尖叫

帖主指不解港人尖叫舉動，指「其實咁多年都仲未叫完咩？嗰啲叫嫁比我啊係咪覺得自己好風趣？」。話說周國賢在演唱會上，感觸提到在舉行演唱會前一周，與他共事七年的同事離世，他謂：「佢係我司機，我有咩需要，她都會好細心，就好似我家姐一樣，我同呢個地方(紅館)一而再再而三地擦身而過，直至今日終於可以喺呢度，但佢行早咗少少，我記得幾個月前，收到開呢個演唱會嘅消息，佢同我講：『終於可以載我上紅館』佢做到喇，多謝家姐，我們會再見」。

周國賢演唱會周國賢演唱會網民指現場人士大叫到聽不到表演者說話 — 網民指現場人士大叫到聽不到表演者說話（圖片來源：Instagram@koholaendy）

誰知此時「有個女仔衝出嚟大嗌周國賢，跟住俾人叫佢收聲，尷到暈」。其後有網民表示自己亦有同感，指港人亂尖叫的程度曾經令台上表演者叫安靜，「以前睇過個show，個歌手明明喺台上低頭醞釀緊情緒，可能有個觀眾以為個歌手想佢地比反應跟住尖叫，然後一堆人跟住嗌，個歌手仲要殊佢哋叫佢哋安靜，勁肉酸」。亦有人留言指「成日大嗌叫人唔好喊，人哋講呢啲就係情緒位，你叫佢唔好喊佢就即刻唔喊？」

低質行為二：拍手節奏錯晒都唔肯停

帖主指，港人亂拍拍子已非第一次發生的醜事，斥明知節奏不對仍堅持到底，極為擾人。「其實人哋live有live編曲，你係都要拍1234做乜啫？人哋要拍子就有鼓佬啦，仲要拍錯晒」。不過有網民反駁指「周仔有時都叫人起身拍手，有人合唱都係鍾意首歌先會姐，佢一唱zarahn無人比反應，唔通個個坐喺到聽，個場冷清清咁好咩？」

低質行為三：係咪都開手機電筒亂咁照

帖主指第三種是「開燈L」，表示「其實人哋係有舞台設計，點解首首歌都要開led燈白到都咩特色都睇唔到，頭先首《我們都不是無辜的》都要開燈fing，無晒feel」。帖主講求燈光諧和，表示「人哋個mood就係用暖色系，你射個白光出去做咩？」、「最怕睇睇吓騷俾強光照射到，因為唔少人會開著手機電筒燈fing嚟fing去，自以為增加氣氛但又唔覺意影響到人。」

周國賢演唱會樓主對周國賢演唱會上，唱moody歌配合燈光，但唔少觀眾欵似開了手機的電筒燈而不滿。 — 樓主對周國賢演唱會上，唱moody歌配合燈光，但唔少觀眾欵似開了手機的電筒燈而不滿。（圖片來源：新假期編輯部）

低質行為四：Encore 3、4次都唔收手

最後帖主提到「encore文化」，似乎是替周國賢辛苦而申訴，指「佢準備咁多就係咁多，死都要叫encore，你聽多首會賺？」文末再補充指：「呢啲人從來只係會自high，覺得自己enjoy完就算」。有網民指「香港人唔蝕底性格出晒嚟」。

周國賢演唱會周國賢演唱會周國賢唔知周國賢知道觀眾睇後感，熱烈討論他演唱會文化會有咩感受呢？ — 唔知周國賢知道觀眾睇後感，熱烈討論他演唱會文化會有咩感受呢？（圖片來源：Facebook@周國賢）

網民：要靜就睇Opera

帖文一出吸到過千likes，但亦有500多unlikes，指演唱會正是講求氣氛，建議不滿的人轉去香港文化大會堂，又指每次都拿外國比較，「流行演唱會根本就係比你hyper興奮尖叫跟住唱，外國歌手就好興奮你識唱，香港唱就畀人鬧，雙重標準」、「而家係咪連演唱會都要考牌先睇得，乜都鬧一餐」、「香港人究竟有幾辛苦，睇個演唱會放鬆吓都要俾人批鬥，係咪細個讀緊書好鍾意舉手話人哋傾偈嗰啲學生嚟」、「要靜就睇Opera啦」。