網民轟平價健身plan勁搵笨 ！整合健身教練必講5大hard sell流程｜玩樂熱話

平價健身plan 就被批評到體無完膚

近日有網民於討論區出post指自己join一個間出名平價健身室，只需要8個月＄1000的plan。俾完錢之後，教練要求樓主留低，然後幫自己量度身體，量度完後不斷批評他身型：「咁輕唔會上到磅」、「左右腳唔平均」樓主指，第一次見就批評到他體無完膚。

當時人拒絕教練再join其他plan之後，該教練竟然叫他用一個銀行app表示可以分期付款，仲寸他：「唔係每個月咁少你都俾唔到下話」令樓主好激氣。

網民整合5大健身教練銷售流程

1. 先批評你身型問題

網民睇完樓主的遭遇之後都紛紛指：少年太天真！好多網民都指：「最平反而係最貴㗎」、「呢間（平健身室）簡直就係垃圾」、「傳銷嚟，同美容院嗰啲一擔擔」。好多人都中過招，被健身教練直接批評身體唔夠fit。

2. 叫你join plan ＋ 3. 無錢會叫你分期

網民指之後就是叫你join plan ，如果無錢會叫你分期。「基本上都係咁，要有心理準備過左呢關，之後你每次做，佢哋會兩個一組咁去夾你，話你呢樣錯個樣錯」、「所以點解d人寧願比貴少少」、「$1000/8個月，你自己諗佢賺咩，沖涼啲水費都蝕比你啦」。

4. 再拒絕就問你最多可以畀幾多

網民指再拒絕就問你最多可以畀幾多，再扮同你計個平plan，有不良手法更是分開同伴，免得你們一起拒絕。討論區中亦有網民都有中過招，他分享自己親身經歷指：「之前公司送免費半年，仲可以帶個fd白嫖半年，點知去到分開我同個fd，各自搵條友sell我哋，我一嚟就直接拒絕咗收佢皮，跟住見我個fd 竟然想join，我想入佢間房救機時被職員阻止，即刻問佢是咪非法禁錮，最後做足半年一毫子都無俾過，每次sell都直接拒絕，打電話嚟直接cut線」

5. 你每次嚟做都會捉你錯處sell你一次

不被sell不是個個都做到，有網民就指講就易，每次去健身都被sell好煩：「咁當你面對面嗰陣就唔係咁易講得出口㗎啦」。

另一方面亦有不少網民對健身教練充滿恨意，懷疑是苦主。「全部不學無術，靠嚇靠呃，掛健身之名，成個健身行業比呢啲垃圾拖冧晒，搞到啲人一聽到健身就等於要碌十幾萬仲要借錢」、「個班垃圾係咪撈唔掂保險走嚟呃x人」。

網民教輕鬆智破Hard Sell地獄！

不少網民都表示自己有被Hard Sell的經歷，有網民教授必殺絕招「戴藍芽耳機」，，戴上耳機扮聽歌或扮講電話，這麼一來就不用與他們對話，亦能避開他們的騷擾。另有網民指試過扮「白卡」，嚇到教練即刻送他走，不用被hard sell。

資料來源：連登討論區、原文刊於：新Monday