上水抄牌變警民衝突 片主發帖公審！網民一面倒：車主太天真 結局竟大反轉？

上水禁區抄牌演變警民衝突 網民意見一面倒：放上網好似仲衰

接近2分鐘長嘅影片上載於「車cam L（香港群組）」，標題「大家都冷靜啲先，抄牌抄到口角，日日都上演，為咩呢」，片中禁區抄牌車主大聲質問鏡頭中警員「差人大晒吖嘛？差人係咪打人都得？講多次吖？！」該名警員則回應「而家係警察年代，差人年代我打咗你喇！」、「你擺上網我就抄到你夠為止。」車主則不甘示弱講到「你鍾意抄100張咪100張囉！」片尾車主將電話推近該名警員，引來警告「你咪隊咁埋嚟呀，到時又話我整爛你電話。」唯車主仍火爆回應「你咪試吓打埋嚟囉！」

網民提出嘅意見大多數都認為車主禁區違泊就係理虧，雖然係搵食車上落貨搵唔到位泊，但罰款都只係幾百蚊又唔會扣分，唔應該大大聲惡人先告狀。而熟該區嘅網民則提出，片中呢個位停車等候會被檢控而不作警告，今次就當買個教訓下次泊前少少。有運輸行業嘅網民就話車主咁樣累街坊，如果個交通警因為呢件事而成日返嚟抄牌就真係多得佢唔少。亦都有網民搞笑回應車主其實係單挑交通警，拖延時間掩護其他車主駛走。

事件原來有前傳 究竟誰對誰錯？

其實影片一開始就已經係大家怒火正盛嘅時候，有網民就懷疑事件係咪有前因。有人就指出原來係另一個群組「的士司機資訊網 Taxi」原來有交代！樓主原來就係被抄牌車主嘅朋友，一開始車主都非常合作，但片中警員態度惡劣，甚至作出人身攻擊，更表示「差人大曬，可以打佢兩鎚」，車主先至忍唔住發火。當然真定假就只有兩位當事人先知了。