【自助餐 放蛇臥底組】$428 海鮮雙子塔 50呎長甜品枱
雖然係晚飯時間，但只有七成入座率，而且座位都幾寬敞，坐得幾舒服。入座無耐有個職員見我無相關的信用卡，都照俾個七折我（原價每人$428，未計加一），即刻覺得好抵。
主打七層和九層的海鮮雙子層，一數發現原來得五層同八層。總共有約十款海鮮可選，如龍蝦鉗、青口、翡翠螺等，海鮮屬靚料，如巨大扇貝，因為蒸太耐都變得非常老，嘥料again！海鮮塔的原理是將蒸海鮮配上收集於塔底的海鮮精華，但這裡湯還湯煲，海鮮還海鮮蒸，兩款法式海龍皇湯和避風塘家鄉番茄薯仔豆腐海鮮湯，味道偏淡，海鮮味似有還無。
選擇好想要的海鮮後，姐姐會把海鮮同湯放埋一齊。
然後去拎海鮮，Refill速度都幾快，唔需要搶住咁拎。當晚新鮮海鮮總共有五款，如松葉蟹腳、小白蝦等。麵包蟹的賣相都幾差，斬到屍橫遍野碎濕濕，最重要的蟹膏蟹籽散落於冰上，認真嘥料！原本主打有翡翠螺和虎蝦，但全晚不見蹤影。
推介蟹腳和小白蝦，鮮甜彈牙，無雪藏味。
刺身和壽司都新鮮，但都係普通款如三文魚、鱲魚等，選擇很少，想瘋狂食刺身壽司的話，呢度一定滿足唔到你。
熱食選擇多但無咩特別，最正係串燒！串燒雖然唔係好多選擇，都係雞翼、翠玉瓜、牛肉等，但味道唔錯，雞翼肉滑，菠蘿多汁！串燒燒完會放旁邊熱住佢，而且有三款醬汁可選，如泰式酸辣醬和甜酸醬等，睇得出都幾細心，讚！
食到咁上下又到咗甜品時間，呢度張甜品枱有成50呎長，糕餅選擇超過十五款，最特別都係有得自製窩夫同刨冰！窩夫製作很簡單，只需將適量蛋漿倒落個模到，合埋個蓋等差唔多兩分鐘就搞掂！新鮮熱辣，旁邊有超過十五款配料任你落，如朱古力碎、棉花糖、蜜糖等，窩夫味道充滿蛋香，粉味不重，必試！
呢部老爺刨冰機雖然有啲生鏽，刨冰是要很用力轉動手柄，並會發出「吱吱」聲，但都幾得意，可以一試。刨出來的冰幾綿，有約十款配料可選，如西米、爆珠、煉奶等。
另一款推介甜品係榴槤布甸！我見隔離枱食咗十幾樽，就等我試吓佢！一開蓋不得了，勁香榴槤味，仲要有榴槤肉，食落啖啖都係好濃郁的榴槤味，布甸好滑，想再追加但好可惜只是淨返一樽，榴槤迷要食就要快手！
雪糕有Haagen-Dazs同Dreyer’s，合共有十款口味，份量亦都好充足。旁邊有Macaron配Dreyers雪糕夾心，望落好精緻，配雪糕好正！
總分：7/10
雖然主打的海鮮塔效果麻麻，海鮮蒸咗好耐影響口感，但所用材料都係新鮮靚貨，而且甜品大加分，特别係自製窩夫、刨冰同榴槤布甸！任飲任食，再加上有七折，折埋再加一都係$300頭，都算抵食。
儷廊咖啡室
地址：九龍城沙浦道30-38號富豪東方酒店地庫1樓（顯示地圖）
電話：2132 3502
晚餐價錢：星期日至四及公眾假期：成人 $428 / 小童 $288；星期五、六及公眾假期前夕：成人 $458 / 小童 $308，另收加一服務費
延伸閱讀：
