【自助餐放蛇起底組】灣仔區食韓燒 $138串燒放題

天氣Keep住凍,我就無興趣上大帽山睇雪啦,近近地去灣仔圍住個火食韓燒咪幾好!今次我哋放蛇組嚟到呢間韓國餐廳,試食串燒烤肉放題,$138任食90分鐘,質素如何?立即去片!

前菜生菜另加錢 豬皮雞皮自行調味

搵好野食當然喺我哋嘅職責~望望張落單紙先,一共有36款嘢食,牛、豬、雞、海鮮每樣都有啲,仲有芝士乜乜乜,睇落好豐富喎!今次我哋仲計下時,由落單到上枱用咗兩分半鐘,執落單嘅齊款同數量,準確!嘢食上枱之後,就開始計時啦!抽油煙桶上面有個計時器,START!幾好喎~可以知道自己食咗幾耐,唔使估估下。

嚟到韓國餐廳,想食泡菜?問下先……原來前菜要另外加$20,前菜有泡菜、花生、青瓜、芽菜同蓮藕,可以Refill。燒到半路,咦,點解無生菜嘅…噢!原來都喺要加錢,$8一份,喊出嚟,無生菜點食喎!

無生菜唔緊要,食真啲個味睇下有無伏位啦!雖則話就話喺串燒放題,但其實點咗咁多樣,雞皮喺唯一有串起嘅燒物,其他都係細細粒。雞皮喺燒嗰陣已經逼咗好多油出嚟,燒到好香口,不過食落無咩味,要點埋甜辣醬、麻醬或鹽先夠惹味!豬皮呢,食落膠質感重,而且好煙韌,不過提提你!黃豆粉喺要自已問店員拎!黃豆粉喺要自已問店員拎!黃豆粉喺要自已問店員拎!好緊要!仲有必食黃金麻吉燒!入面包著年糕,燒完後外皮好香脆,咬著軟綿綿的年糕,好好食啊!

奇怪醬汁 飲品另加錢 

牛、豬、雞肉逐款同你試!首先同你介紹三大伏位,韓式咖喱雞肉非常古惑,嗰咖喱汁喺酸嫁!好似過咗期咁,難食到爆。五花腩好細件,肉質唔夠滑;黑椒牛肉要改名做黑椒牛肉粒!碎濕濕咁邊夠口感喎!而且黑椒味被鹹味完全蓋過,咪試!

蜜汁豬面青幾大件,而且肉質好嫩,不過唔知係咪廚師唔記得調味,都食唔到蜜汁味嘅。焙煎芝麻雞就好好多啦!雞肉有好多芝麻粒粒包圍著,食落好有口感,而且甜甜地,叫多幾件啦!

食到一半有啲口乾呢?Menu上面好多嘢,又有真露、汽水,不過今餐唔包飲品嫁!要飲就自己加錢啦!

酸味芝士撻x淡味芝士杯 

雖則我唔係燒雞翼嘅高手,仲一個不留神燒到燶咗,但其實隻雞翼食落肉質嫩滑帶甜味,好食~可以Encore!另外你最期待的芝士、芝士、芝士燒物!滿心歡喜點咗個炙燒芝士年糕,白雪雪,漲卜卜,好似包著好多芝士咁,慢慢兩邊燒下佢,點知店員教我哋要拎隻匙一嘢壓下去,要等入面啲芝士都可以受熱。um……即刻醜咗一萬倍,成舊餅咁邊似年糕喎。食落味道仲奇怪,似食緊芝士撻,不過喺A貨嗰隻,隻酸味勁奇怪,同埋食一個都好濟囉。

第二款芝士粟米杯連錫紙兜一齊上,一上枱店員已經直接幫你放上爐,望住啲芝士融,慢慢同粟米交纏,仲拉到絲,好似好好食咁,不過食完又有啲失望囉,芝士味唔濃,淡茂茂咁,單食完全接受唔到,蘸肉食就好啲,芝士迷要失望了!

總結:

論味道,醃過的咖喱醬、黑椒、蜜汁都有少少伏,得芝麻個款好食啲,其他無調味的都正正常常。而且無嘢飲喎,時間得90分鐘都有啲chur,勝在環境同服務幫佢救咗唔少分,而且灣仔區$138可以落到樓,算ok啦!

總分:7/10

䊾宅韓國燒烤‧料理

地址: 灣仔灣仔道230號佳誠大廈地下(顯示地圖)
電話:5523 0320/3188 6628
任食串燒供應時間:12pm-3pm,6pm-11:30pm
收費: $138
用餐時間:入座時間起計90分鐘
備註:收加一

延伸閱讀:
【18區掃食】粉嶺茶記 示愛蛋包飯
懶得出街打邊爐!3大火鍋速遞套餐比拼

最新吃喝玩樂資訊