的士司機被內地客搞到𢱑晒頭:「車我去得滴路酒店!」|網絡熱話

自十幾年前政府推行自由行政策後,就多咗好多內地人到港旅行,振興香港旅遊業、零售業等行業。日前有的士司機喺「的士司機資訊網」Facebook群組分享,早前載咗三位年約5十幾歲內地人,不過由於溝通上有困難,所以鬧出一小段笑話。

撰文:Evita | 圖片:的士司機資訊網Facebook、劇照

的士司機被內地客考起

的士司機Kelvin日前喺Facebook群組分享,早前接載三個內地人,但係內地人只係識得唔咸唔淡廣東話。

內地人:「師傅麻煩車我去得滴路啊!」

Kelvin :「咩路話?」

內地人:「得滴路酒店啊!」

Kelvin:「係邊㗎?」

內地人:「吓,咁出名你都唔知啊?」

各位睇到呢到,你哋又估唔估到「得滴路」酒店喺邊呢?後來內地人問Kelvin:「圓光聽過無?」先知原來係講緊九龍站圓方。

內地人:「圓光嗰邊咪有間得滴路酒店囉!」

Kelvin:「W酒店啊?」

之後內地人表示見到架的士咁新淨,識得自動開門,認為Kelvin應該係好有見識先至啱。

內地人又繼續問Kelvin,部車點樣感應開門,Kelvin表示當時紅燈,就講咗句「開門」,然後車門就開咗,內地人好似未見過咁新奇嘅事,不禁「嘩」一聲。Kelvin再講「關門」,內地人又再「嘩」一聲,更大讚Kelvin部車先進。

Kelvin:「以後香港坐的士唔好亂講咩門咩門,分分鐘跌你落車!」

Kelvin喺帖文到以hashtag表示「真係信度門聲控」、「大陸都有的士掛」,認真搞笑。

網民睇完貼文後都紛紛留言表示「笑死」,有人更話「聲控同語音提示,係(喺)大陸人眼中都係高科技。」

關鍵詞
網絡熱話

最新吃喝玩樂資訊