督察
督察

女友有咗毅進警督察骨肉 被飛巴打:「決定下個月考公務員!」

熱話

廣告

正所謂「七年之癢」,有啲人拍拖拍到第七年時就必定心癢癢想出去偷嘗禁果,近日有巴打喺連登發文,指自己同拍拖七年嘅女朋友分手,原因竟然係……

撰文:Evita | 圖片:劇照、連登討論區

巴打女友懷上毅進警督察BB

日前有巴打喺討論區寫咗篇長文,主要係話拍拖七年嘅女朋友每逢放假都會話有嘢做唔願出街,又唔畀巴打上去佢屋企坐,結果兩、三個月先見一次,巴打亦都知道呢個係分手嘅先兆。

巴打指知道女朋友有個中學男同學追過佢,事敗後雙方成為好朋友,而且一直保持聯絡。女朋友仲要經常讚呢位男同學自強不息,皆因中五無讀書後就讀毅進,考入警察後再喺香港公開大學進修,成功畀佢升咗做督察。

女友經常喺巴打面前大讚呢位督察男同學係「筍盤」,結果……女友有埋督察嘅BB。巴打話女友約佢出嚟攤牌,指自己有一段時間對巴打感情轉淡,於是搵咗督察出嚟訴苦,點知傾吓傾吓就……大家明㗎啦!

巴打表示督察男雖然係毅進出身,但係畀佢讀埋學士升做督察就變成高薪一族,有宿舍又有長糧,完完全全係女友追求嘅生活。然而巴打反思自己雖然都係大學畢業,不過同典型打工仔無分別,更道出如果唔係社會上最「標青」嘅人,人工根本無得同公務員鬥。

巴打話同女友未傾完,督察就出現!督察好熱情咁同巴打握手,再扶住女友去停車場,一邊摸住女主角個肚一邊曬車匙。巴打:「我望住佢哋背影,決定放開一切,獨自踩單車返屋企,準備應考下個月嘅 CRE(綜合招聘考試)。」

網民睇完巴打分享之後反應兩極,有人就話唔明點解啲女仔會鍾意紀律部隊,又有人話其實係樓主唔夠上進,而唔係人哋叻,不過都有網民質疑呢篇只係潮文,所以大家都唔使咁認真嘅。

 

最新吃喝玩樂資訊