無品港媽行超市教女!「唔好做理貨員,讀書唔成先做呢啲低賤工種!」|網絡熱話
無品港媽行超市教女!「唔好做理貨員,讀書唔成先做呢啲低賤工種!」|網絡熱話

無品港媽行超市教女!「唔好做理貨員,讀書唔成先做呢啲低賤工種!」|網絡熱話

雖然工作有分用腦力同勞力,但係職業無分貴賤,每個職業都有佢喺社會上嘅價值同作用,不過地球總會有人認為自己高高在上,睇唔起其他人。有做超市理貨員嘅網民投稿至Facebook專頁「西客之道 Hispitality Secret」,指有港媽帶同囡囡行超市,過程中同囡囡嘅對話令網民嬲爆!

撰文:Evita | 圖片:新傳媒圖片庫、西客之道Facebook

港媽超市內教女唔好做理貨員

有喺超市返工嘅網民早前投稿至Facebook專頁「西客之道 Hispitality Secret」,指有日與同事喺舖頭執貨架時,聽到有一對母女的對話,內容如下:

細路女問媽媽:「呢兩個姐姐喺到做啲咩啊?」

港媽:「呢兩個就係啲執貨嘅人,要搬搬抬抬好辛苦架!」

示意圖,非涉事店舖
超市理貨員網上大吐苦水,分享被港媽羞辱經歷(示意圖,非涉事店舖)(圖片來源:新假期)

理貨員就話聽到呢到都正常,唔想出聲,點知跟住嘅對話先乞人憎。

妹妹:「點解辛苦嘅?」

港媽:「因為呢兩個人讀書唔成,所以要做埋晒呢啲咁下賤嘅工種,要喺度執埋晒啲狗屎垃圾,你大個要孝順我啊,唔好似佢地咁啊知唔知?」

理貨員聽到嬲爆,表示做呢份工養得起自己同父母,完全對得住自己,而非港媽口中所講嘅下賤。

示意圖,非涉事店舖
事主覺得理貨員這份工作完全對得住自己,而非港媽口中所講嘅下賤。(示意圖,非涉事店舖)(圖片來源:新假期)

於是理貨員就同同事大聲扮傾偈:「我哋喺度執緊垃圾,咁入嚟嗰啲係咩人呢吓?」

同事:「嗰啲咪就係入嚟揀垃圾囉,我地袋住人工去執啲狗屎垃圾,慘過有啲人仲要畀錢買啊陰功。」

港媽聽到呢番說話後,不禁大鬧:「你哋呢啲咁嘅人識得啲咩啊?」而同事都忍唔住回應對方係怪獸家長兼玻璃心。

不過港媽都唔執輸,以「抵你成世打呢份工啊!做埋晒呢啲低級工種!」回敬。

理貨員就表示:「真係咁高級就唔洗幫襯我地呢啲貧民窟啦!」

示意圖,非涉事店舖
港媽的行為實在勁無品(示意圖,非涉事店舖)(圖片來源:新假期)

網民鬧爆港媽:狗眼看人低!

事件喺Facebook發布後,得到大批網民鬧爆港媽「唔識尊重人」、「狗眼看人低」,「做緊大學去超市做兼職好正常」等等,亦有人擔心事件中嘅囡囡大個咗會變咗阿媽咁野蠻。

「讀書唔成先做低賤工種」港媽超市內教女將來唔好做理貨員|網絡熱話
網民一面倒聲討港媽不懂尊重人。(圖片來源:Facebook截圖)
「讀書唔成先做低賤工種」港媽超市內教女將來唔好做理貨員|網絡熱話
網民認為行行出狀元,沒必要其實別人的職業。(圖片來源:Facebook截圖)

其實職業無分貴賤,不同的工種都在不同的崗位上貢獻社會,不應有高低之分。家長應該灌輸小朋友正確的價值觀,千萬不要好似事件中的港媽一樣歧視別人的職業,每一位努力工作的人都應該受到尊重!

 

撰文:Evita | 圖片:新傳媒圖片庫、西客之道Facebook

 

關鍵詞
網絡熱話

最新吃喝玩樂資訊