姆明化身聖誕樹 免費玩全景selfie【旺角好去處】

聖誕樹就見得多喇,姆明咁嘅樣嘅聖誕樹,你又見過未?今次姆明帶晒一家大細嚟到旺角呢個商場,亞美、史力奇、樹精全部都嚟晒,仲引入咗超遠鏡頭,等大家可以同姆明一族玩全景自拍,最重要嘅係,免費㗎!

呢棵巨型姆明聖誕樹絕對係推介影相位,上面嘅燈仲識轉色嘅添!只要行去佢身旁嘅指定位置,燈飾就會由黃色變成紫色。姆明已經少見,今次仲要有佢嘅聖誕樹,真係唔影多幾張相都對唔住自己呀!

今次商場引入咗自拍Cam,鏡頭設於3層樓之上,影出嚟嘅相有2,200萬像素,放大嚟睇依然睇得清五官!

影完之後,張相會send返去你email。不過記者就覺得,似乎平面影出嚟效果比較靚,所以呢個全景自拍,都係貪得意玩吓就好,要影靚相都係建議就咁影~

除咗必影嘅姆明之外,仲有好多影相位!亞美、史力奇、歌妮、樹精全部有齊!

呢間期間限定嘅pop-up store都算幾多嘢賣,而且仲有唔少由日本同芬蘭空運到港嘅獨家product,得呢度有得賣㗎咋!

除咗影吓相買吓嘢之外,仲可以去L3層油吓顏色!姆明化身成巨型壁畫,等大家填吓色治癒吓。不過記者拎住顏色筆想填嘅時候,突然驚覺姆明係白色,唔知到點填好,咁就唯有幫佢畫隻紅眼睛,等佢幽幽的看著這孤城啦~

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!

最新吃喝玩樂資訊