ABC Cooking Studio教學 零失敗日本 梨王 撻!

熱話

廣告

ABC Cooking Studio最近以被譽為日本 梨王 嘅二十世紀梨為題,教整法式梨撻同果醬,仲有日籍老師教!記者梗係唔執輸去試整啦!但係試整完之後,上網見到個班已經FULL晒!唔知嚟緊仲會唔會加班!咁瘋狂,係咪真係一學就識咁勁?記者記錄咗當日試造嘅情況俾大家睇下,萬一真係報唔到咁慘豬,都可以望下吖!

記者試整:唔難整但步驟多

對於甚少整甜品嘅記者Ducky嚟講,起初以為整 梨王 撻會好難。不過呢個班一步一步教,每做一個Step,導師都會巡一巡,睇下有無學生跟唔上進度,唔識都可以問,所以唔算難整,失敗率都唔高,但步驟就比較多,整梨王 撻同果醬都要2個鐘頭多少少,所以要有耐性啦!

整撻11個步驟

步驟咁多,所以我地簡化咗大約有11個,等大家可以睇到下呢個梨王 撻嘅誕生過程。

頭先講到個粉團放咗入雪櫃雪,同埋切咗梨,20分鐘後拎返個粉團出嚟,就用嚟整撻皮啦!

要整得靚,記住3個小貼士

想整到個梨撻靚一靚?呃下like?記得以下呢3個小貼士,就有機會整到同導師嗰個差唔多樣啦!

1. 搓撻皮時,要盡量壓實粉團,否則撻皮會好鬆散。

2. 切梨片時,每片厚度要平均,約2mm厚,鋪喺撻皮時會更整齊。

3. 焗撻皮時,要鋪上重石,防止撻皮受熱時會膨脹鼓起。

梨王做果醬,只需4個step!

比起 梨王 撻,果醬相對步驟少好多,亦都無乜難度,都係煮啫,以下就係嗰4個Step喇!可能有讀者問,如果唔鍾意食梨,可以用乜嘢生果整果撻同果醬呢?其實仲可以用士多啤梨、蘋果同桃等代替,最緊要嗰種水果要夠香甜同水份,整出嚟會好食好多。

九月份嘅班已經FULL晒?

記者去到Studio,入面負責人話個整餅班由9月7號開到10月4號,之前已經接受報名,但係反應太熱烈,成個9月份嘅班已經FULL晒,仲未必加到班!唉,網上都見到有唔少絲打嬲嬲豬報唔到,原來真係乜都要撲,希望大會有得加班啦,我哋喺呢度都照俾大家睇下詳情,希望想去嘅讀者好運!(整完可以將成品報上我哋新假期飲食邪惡情報度開心share架!)

鳥取縣產梨料理教室

日期:2015年9月7日至10月4日

收費:$280

制作時間:2小時

成品:法式梨撻一個、甜梨果醬一樽

上課地點:PMQ studio (顯示地圖)、K11studio(顯示地圖)

預約網址:https://www.buys.hk/abc-cooking-studio/

點解叫日本梨王?

呢次整餅班用嘅二十世紀梨,被譽為日本梨王!點解咁有霸氣?依家就睇下佢有幾勁!
1. 夠脆夠甜夠水份鳥取縣最出名
二十世紀梨係於1888年由一個13歲少年發現,梨嘅果皮係青綠色,口感鬆脆,香甜多汁,更成為鳥取縣嘅代表水果,亦都有個鳥取二十世紀梨記念館專門講呢種梨,咪話唔巴閉。

2.最好嘅先會留得低
要成為日本梨王,栽植方法好緊要,由於二十世紀梨幾乎唔會自然交配,所以要果農將花粉逐一進行人工授粉,而一枝樹枝大約會結3至5個果子,果農會摘走無咁好嘅果子,只會留返一個最好嘅,等佢可以吸收更多營養生長。

3.摘完仲要揀過
摘咗嘅二十世紀梨仲要入選果場,用光感儀器判斷梨嘅形狀、甜度同成熟度,再根據重量、顏色分級,然後按唔同等級入箱。
 

記者試食:非常爽脆

講到咁勁,一於試下值唔值梨王呢個美譽!切開個梨都聞到香味,皮好薄,梨肉好白,食落去係非常爽脆!同埋好多汁,味道幾清甜。如果想個梨好味啲,就將個梨用室溫存放,食之前再放入雪櫃雪2至3個鐘,提升糖度,但唔好雪太耐,因為雪得太耐,就會失去甜味架!不過因為造期關係,香港預定9月頭至10月頭先食到,想食就要留意啦!

預定銷售時期:2015年9月上旬至10 月上旬

銷售點:百佳、Great、Taste、AEON、SOGO

延伸閱讀
東京直擊!4大 芝士撻 終極比拼!
自製甜品 櫻花水晶球 呃like無難度!
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8

Android:https://play.google.com/store/apps/details?id=com.weekendhk.newsstand2&hl=zh_HK

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!