荃灣
荃灣

【周末遊懶人包】荃灣生活百貨精華遊 兩大日店首次進駐香港

熱話

廣告

購物從來都係女孩子嘅天性,一個吸引嘅商場就可以令我哋留足一日。而AEON荃灣分店重新裝修之後,唔止好行咗,仲引入咗兩間日本大熱店舖,分別係生活精品百貨店R.O.U.,同埋以天然、有機作為賣點嘅AEONBODY。

喺日本有超過13間分店嘅R.O.U.,嚟到香港開第一間海外分店,咁就梗係唔會令大家失望啦,驟眼睇,都有d似LOG-ON嘅感覺,不過價錢就似乎冇咁貴,而且環境大,行落好舒服。

免費即場印相 自製偽貼紙相

新張期內,R.O.U.提供免費相片沖印服務(原價$6/張)。介紹得,就當然唔會只係得曬相咁簡單啦!大家仲可以隨意加入唔同嘅圖案同邊框去裝飾相片,好有以前影貼紙嘅感覺!

免費雕刻服務 自製男神女神專用筆

只要喺R.O.U.購物滿$100,而買嘅嘢入面有筆嘅話,就可以免費刻字。無論係中、英、日文,甚至符號都得,只要打到入電腦就刻到!$100實在唔係咩大數目,好容易就可以買夠數,即係變相幾乎等於買筆就送刻字服務。

1. 手作人必玩 另類填色

除咗用顏色筆油油油之外,都可以試吓用膠水同花紙填顏色!來自法國嘅decopatch,以拼貼花紙嚟填顏色,只要將花紙撕成細size,再塗上專用膠水,就可以簡簡單單製作出靚靚嘅擺設,真係美勞零分都可以扮藝術家! 目前只有荃灣R.O.U.有得賣!

2. 日本大熱船梨精

呢隻人氣吉祥物喺香港相對比較少見,呢度一次過有咁多佢嘅精品,粉絲們唔好錯過!

3. 紙製飲管砌模型

來自日本嘅PIPEROID,其實係一d七彩紙製飲管,只需要用較剪剪開再組裝,就可以輕鬆砌出不同人物嘅模型!

4.日本國寶級帆布

倉敷帆布喺日本有超過一百年歷史,絕對係品質嘅保證,雖然唔係d咩獨家嘢,但係都值得一買。

R.O.U.

地址:荃灣大河道88號灣景廣場購物中心1樓(顯示地圖
營業時間:10am – 10:30pm
電話:36652665

AEONBODY喺東京有4間分店,今次嚟到香港開首間海外分店,以健康同美麗作概念,主要售賣天然、有機嘅食品及身體護理產品。記者行咗一轉都睇中咗好多嘢,不過好多都因為成份天然而且係進口貨,所以價錢上有少少令人卻步。

呢款蜜糖來自廣島縣瀨戶田町,有橙味同檸檬味,用原個生果加上蜜糖製成,秋冬飲就啱晒喇!

水素水即係近年越嚟越多人飲嘅富氫水,以納米技術將氫加入水入面,可以將多餘嘅電子帶離身體,有助抗衰老及美化肌膚。飲落有d飲礦泉水嘅味,不過開咗之後記住要盡快飲用,如果唔係氫就有機會同水分離。

外國近年興起「無麩質飲食」,連荷里活影星都支持,AEONBODY賣嘅意粉大部分都不含麩質,可以優化腸胃,避免出現腹脹、胃痛及腹瀉等症狀。

雖然AEONBODY大部分護膚品都比較貴,但係都一樣有抵買之選,呢款30片裝保濕面膜,只係賣$59.9,即係兩蚊都唔駛就有一塊面膜,敷足一個月都唔駛$60,抵!

呢款保濕霜,淨係睇個賣相已經吸引到女士們嘅目光,有淡濕嘅薰衣草香,用完之後仲可以keep返個盒,細細個放髮夾就啱晒!不過價錢就有少粉貴喇,75g就要$159。

AEONBODY亦有賣女士們最貼身嘅用品,唔講唔知,原來衛生巾都可以有機!原來指嘅係種植棉花嘅時候,農夫絕不採用化學農藥、催生劑以及漂白劑,而衛生巾嘅吸水層亦以木漿代替化學吸水珠。

AEONBODY

地址:荃灣大河道88號灣景廣場購物中心1樓(顯示地圖
營業時間:10am – 10:30pm
電話:36652665

除咗早前推出嘅人頭雞蛋仔,Fullhouse Kitchen又推出咗另一少女呃like之選,呢4款甜品以精緻嘅「香水瓶」裝住,同時又有d似魔法球,影相打卡必然之選!

甜品一共有4款口味,分別係英式吉士千層蛋糕、提拉米蘇、意式奶凍及木糠布甸,每日限量發售。食完仲可以拎走個盒,$36又有得食又有得拎,少女們,仲等咩呀?