日本車站驚現大大張證件相變另類宣傳大學生無奈表示：寄錯嘢

Apr 25 2019

【日本熱話】相信唔少人都會試過做嘢時send email犯下一啲粗心大意嘅小失誤，例如唔記得加附件、send錯嘢俾老細等等，鬧出唔少瘀事。而近日喺日本有位大學生原先想為自己學校嘅社團招募新社員而打算喺日本車站登廣告，但就係因為大意而搞到自己嘅證件相大大張登咗喺車站廣告，令自己一夜爆紅！

撰文：PC | 圖片來源：Twitter @OKD_OOPS

原為於日本車站登社團招募新社員廣告誤寄證件相

呢位咁大意嘅日本網民係嚟自早稻田大學兼東北學生稻門會幹事長，早前為咗自己學校嘅社團招募新社員而登廣告，但就唔小心將廣告內容同自己嘅證件相調亂咗，將自己嘅證件相寄咗去廣告印刷廠，直到車站將廣告出街先發現廣告變咗自己個樣！

網民發現咗之後，就將自己嘅「瘀事」於上自己Twitter，點知唔洗一日已經有24萬讚好同近9萬個轉載，意外得到另類宣傳效果。而佢都即刻順勢借機宣傳各個社團活動，仲話佢嘅「證件相廣告」會喺日本早稻田站刊登到4月30日先會落架。

大量日本網民唔單止冇笑到呢位幹事長，反而仲大讚佢好有創意，打破咗廣告傳統既定嘅框框，仲利用埋網路快速散播嘅特點，而家嘅宣傳效果仲好過平時㖭呀！不過另外都有網民話，正常印刷廠都會先同客人確認返廣告嘅內容係咪啱，懷疑呢個係「被意外」事件！不過都大讚幹事長大膽嘅諗法呀！

關鍵詞