Do姐
Do姐

Do姐帶隊去旅行!英、法、澳Shopping 率先睇

旅遊

廣告

不論你對鄭裕玲Do姐的印象係牙尖嘴利的毛小慧、抑或提你出門要買保險的代言人,其精明消費形象確實深入民心。今回主持《Do姐去Shopping》本著一年平均去三五七次旅行的經驗和識飲識食歎世界宗旨,出征巴黎、倫敦、澳洲的塔斯曼尼亞和墨爾本奉旨購物。對於旅遊shopping有獨到見解的Do姐,保證此行瘋狂掃貨、敗家行為絕不發生。節目播出前,向大家率先拆解Do姐「特別的Shopping技巧」!

出巡路線:

旅遊經驗豐富的Do 姐,私下旅行都經常歐遊,所以今次要去三地拍攝可謂去慣去熟,唯獨塔斯曼尼亞首次踏足。不過相比平日慢慢歎世界,今次為了一連三周共15集節目,都要分別 在今年5、6、9月先後出發三地。飛得咁頻密,加上每站停留僅10日,即係兩日就要完成一集,你都咪話唔趕!

#1 精明首誡 齋睇唔買

身家豐厚的Do 姐一早儲夠錢退休,靠的可能係平日夠精打細算。旅程中Do 姐講明「買嘢要精明,試清楚先。」工作人員表示見得最多唔係畀錢的畫面,係Do 姐左試右揀,最終「齋睇唔買」。在巴黎去到以手工精細見稱、連英國皇妃海蒂婚紗上的喱士都是她們出品的Sophie Hallette,Do 姐即使對各款式心動,不過一聽見動輒幾十至幾百蚊歐元一碼,她都選擇忍手。

#2 物有所值 毫不吝嗇

論Shopping 資歷Do 姐肯肯定係神枱級,所以已經儲落一大堆心得,「如果見到心頭好, 唔好諗住返轉頭先買,因為旅行好少行回頭路。」平日著重運動養生keep fit 的Do 姐去到澳洲就選擇在瑜伽服飾專門店Lorna Jane,豪花過萬港元買走幾套衫。「雖然話香港咩都有得買,不過款式少,就算價錢貴,難得去到又實用都要掃貨!」所以鍾意畫畫的Do 姐去到巴黎以製作世界上第一枝油畫筆聞名的畫具店Sennelier 都揀了幾款顏色特別,香港買不到的顏料。

#3 復古新潮 無一不曉

作為長青輩級潮流icon 的Do 姐,原來都係第一次親身在巴黎睇時裝騷。為了配合時裝周,攝製隊專登安排到9月底先出發,但因拍攝時間緊迫,最終只睇到Elie Saab 春夏時裝一場。平日霸氣十足的Do 姐,難得見到品牌設計師、再入後台化妝間,即時好似小粉絲咁興奮。不過搵得Do 姐又點會只係講新潮,對Vintage 都有研究的她,會同翠如、農夫在巴黎的古董市場穿梭,一齊鑑賞跨越不同年代的名牌珠寶、絕版首飾同行李箱。

#4 家品情懷 放棄名牌

Do 姐當年拍劇貼錢打工,出動私伙名牌手袋同台演出。不過如今她自己就話已過咗追求名牌的年紀,出遊比較鍾意添置家品, 所以在英國都特意去到當地被Timeout 雜誌選為Top100之一的潮流家具店Darkroom。但最令記者驚訝是在塔斯曼尼亞的Salamanca Market,Do 姐居然睇中得意可愛的薰衣草啤啤熊,最後仲推介幕後工作人員齊齊掃貨買入多隻回港。

#5 跟風唔型 網購要醒

平時貴氣上身的Do 姐其實唔止識得高檔Brand,小品設計都會留意。「因為名牌香港都有不少,所以如果去到當地會多睇非大品牌出品。」難怪佢喺巴黎都會買入多款小店手工製的戒指。此店雖然有網購服務,不過Do 姐話:「我鍾意在實體店試過先, 除非對嗰間店好熟悉同信心先會網購。」貫徹試啱先買的原則之餘,仲話以前經常買完返去無用而浪費,最好知道自己的風格先入貨,咪盲目跟風!

#6 精挑送禮 手信啱使

Do 姐自己去旅行都有買手信的習慣,兩位電台拍檔少爺占和Donald 都收過幾次。不過今次高調出差周遊列國,結果同普通打工仔一樣,收到一張張來自藝人朋友的手信清單。而完成「任務」之餘,拍攝過程中佢都不忘再揀心水禮物送人,仲會解釋原因。講到底Do姐送禮最緊要啱對方使,好過亂買派街唔得體。

《Do姐去Shopping 》
日期:11月9日至27日
播出時間:周一至五晚上10時30分
頻道:翡翠台/高清翡翠台

 

延伸閱讀:
平飛歐洲!下年6月30日前出發!來回歐洲各地連稅$4,192 起 – 卡塔爾航空@Flyday
遊客都去到!占士邦電影場景大起底

最新吃喝玩樂資訊