Do姐 再Shopping 農夫
Do姐 再Shopping 農夫

《Do姐再Shopping》下星期首播|爆笑農夫再出遊 節目預告率先睇 (含少量劇透)

旅遊

廣告

TVB台慶熱話絕對唔少得陸永鬼馬扮演Do姐一幕,相信不少觀眾都對呢對爆笑組合好有興趣。原來Do姐、農夫又出發去旅行啦!今一輯旅遊節目《Do姐再Shopping》,繼續有翠如、馬明主持,加上蕭正楠一齊同遊日本、丹麥、意大利!下星期將會首播,一連三星期播出15集的精彩內容,究竟仲有幾多爆笑位?很期待啊!

文:Cynthia, Ellissa|圖片來源:TVB、眾星IG

少少劇透1: 翠如BB@日本 揸Mario Kart

Do姐一直喜愛亞洲地區,今次首星期5集特登搵嚟翠如BB,同農夫一齊去日本,行程可謂處處驚喜!從節目預告片中,睇到佢哋齊齊去攀石,估唔到翠如居然輸畀Do姐!然後又喺街頭玩高卡車飄移,可惜無車牌的陸永就只好喺旁邊做啦啦隊!

三位主持大玩高卡車!
三位主持大玩高卡車!
陸永變身熱情啦啦隊打氣!
陸永變身熱情啦啦隊打氣!

少少劇透2:馬明@丹麥 天然呆踩單車

第二個禮拜,Do姐、農夫找來馬國明一齊出發,同遊丹麥!嚟到有單車城之稱的哥本哈根,幾位主持決定親身體驗異國踩單車。而唔識踩單車的陸永就由C君載佢周圍去,二人「同車」的溫馨畫面大家可以喺TVB預告片先睹為快!而且馬明喺行程不斷擦Do姐鞋,相擦出的火花比呆滯跳舞更爆笑!

嚟到單車之城的哥本哈根點可以唔同單車影吓chok相呢!
嚟到單車之城的哥本哈根點可以唔同單車影吓chok相呢!

少少劇透3:蕭正楠@意大利 Chok住血拼

最後一站有蕭正楠加入旅行團,全新搭檔的四人組合不知道又有幾多笑料,齊齊去充滿高級品牌的意大利。飲飲食食少不免,當地的首飾、服裝名店一定引起佢地的購物慾,一班主持又要大出血喇!

蕭正楠正式加入戰團,同大家齊齊去shopping!
蕭正楠正式加入戰團,同大家齊齊去shopping!

飛甩上輯嘉賓唯唯 記招現身撐場

齋睇今輯節目的預告片當然唔夠喉,今個星期一《Do姐再Shopping》率先為節目造勢,舉辦記者招待會,6位主持同嘉賓都齊齊出席,仲搵嚟上一輯兩位驚喜嘉賓梁烈唯同鄭俊泓「托蟹」出場,請Do姐食蟹為乜?唔通兩位被雪太耐?

記者會中段突然唯唯同阿Fred突然假扮外賣仔秘密現身,專程「托蟹」送俾Do姐,夠曬驚喜!
記者會中段突然唯唯同阿Fred突然假扮外賣仔秘密現身,專程「托蟹」送俾Do姐,夠曬驚喜!

Do姐唔鬧「垃圾」 新金句侮辱農夫

上一輯農夫幫Do姐起咗好多花名,被問到今輯有無爆笑金句嘅時候,Do姐不甘示弱地表示,為咗唔成日叫兩隻嘢「垃圾」,仲獨創咗好多唔重覆嘅侮辱金句教訓C君同陸永!記招上Do姐無透露半點口風,到底有幾賤咀,到時要睇節目睇下Do姐點鬧佢哋先知啦!

Do姐話侮辱字句要再創新啲,唔用上一輯嘅「垃圾」喇!
Do姐話侮辱字句要再創新啲,唔用上一輯嘅「垃圾」喇!

陸永面青 剝牙慶生日

翻睇Do姐IG,今年6月27日去到北海道拍攝期間正值陸永生日,無得同屋企人及愛女慶祝,Do姐同劇組就諗住好warm咁畀個特別驚喜佢啦!點知陸永當日由朝早就開始面青青,原來係牙痛,要响日本即時剝大牙!陸永仲大讚日本醫院服務超好,好到:「無牙都要去剝一剝!」

#do姐再shopping #北海道 Happy Birthday @6wing_fama

A post shared by 鄭裕玲 Do Do Cheng (@do_do_cheng) on

嫌農夫醜 大讚同行男神夠養眼

成日嫌農夫唔夠有型嘅Do姐,今次就揀咗兩位男神馬國明同蕭正楠分別去歐遊。Do姐大讚對兩位男神好滿意,仲讚佢哋好靚仔!仲話每次望望農夫,再睇吓另外兩個嘉賓,就開心到見牙唔見眼!

#do姐再shopping #denmark #copenhagen @ckwancheng #馬國明

A post shared by 鄭裕玲 Do Do Cheng (@do_do_cheng) on

農夫對Do姐從一如終

至於被問到農夫會唔會想好似森美咁,可以「二拖三」同年輕女藝人拍旅遊節目,農夫就耍手擰頭,仲話:「睇吓其他人,再望望Do姐,點都係Do姐最好,最完美!」記招就有咁多爆笑位,相信節目仲有大量精采好笑對話,就唔好錯過節目啦!

早前農夫拍攝旅遊節目,Do姐專程飛過去探佢地!C君更加用英文話「She is my mom!」
早前農夫拍攝旅遊節目,Do姐專程飛過去探佢地!C君更加用英文話「She is my mom!」
睇吓Do姐個樣幾冧!
睇吓Do姐個樣幾冧!

好事近??蕭正楠 Shopping睇婚戒

蕭正楠第一次同Do姐、農夫去旅行,Do姐深知蕭正楠需要,突登在意大利帶佢睇婚戒。蕭正楠接受訪問時直認當地求婚戒指「好平㗎!」、「只係嗰百幾萬!」仲大讚米蘭去睇嗰間店舖手工戒指,工藝上真係完全無得彈,好啱佢心意,到底有幾抵、最後又有無買到?真係要睇過節目先知!

相信第一次參與拍攝嘅蕭正楠一定好享受旅程!
相信第一次參與拍攝嘅蕭正楠一定好享受旅程!

最想帶女友BB去Parma

被問到節目當中去過的景點,最想同女友去邊到,蕭正楠大讚意大利盛產巴馬火腿的Parma市,有好靚的教堂、特色茶座同幽靜氣氛,加上女朋友比較喜歡靜的環境,所以希望可以帶佢去Parma市,唔知觀眾睇完節目之後,會唔會心思思想同翠如BB去Parma 市二人世界呢!

嚟到Parma市一定要食Parma Ham喇!
嚟到Parma市一定要食Parma Ham喇!

翠如一邊做節目 一邊睇Show

上一輯節目都有參與的翠如BB,今集面對Do姐更加放鬆更玩得,仲話農夫同Do姐的火花勁到可以做「花生友」企埋一邊當睇show,睇嚟今輯的精彩程度都好有保證。

成為Do姐同農夫嘅拍檔,翠如喺旅程入面應該變身觀眾睇talk show喇!
成為Do姐同農夫嘅拍檔,翠如喺旅程入面應該變身觀眾睇talk show喇!

深入夕張蜜瓜節

被問到整個節目當中,覺得最好玩最印象深刻的景點,翠如BB最記得「夕張蜜瓜祭」的拍賣環節,佢話過程真係好刺激好好玩,又可以超平價錢買到勁多蜜瓜,競投仲好好玩𠻹!Do姐仲喺預告示範「蜜瓜搽臉法」,好期待呀!

翠如話競投哈密瓜最令佢印象深刻!
翠如話競投哈密瓜最令佢印象深刻!

推薦情侶 東京玩攀石

日本部分咁多景點,問佢最推薦情侶去的地方,翠如BB停咗5秒用心思考,最後推薦攀石場,話可以透過攀石睇到對方的優缺點,仲自嘲自己體能好差,到底翠如有幾唔擅長攀石?真係要睇過先知!

雖然翠如話自己體能差,但佢曾經都有努力過㗎!
雖然翠如話自己體能差,但佢曾經都有努力過㗎!
呢個問題佢足足諗咗5秒啊,夠曬認真!
呢個問題佢足足諗咗5秒啊,夠曬認真!

馬國明唔愛馬國 熱愛丹麥家具店

第二次參加Shopping團的馬國明,今次以男神形象氹得Do姐勁開心,仲長知識了發現丹麥原來唔係盛產曲奇的,原來丹麥好多其他特色嘢,當中最吸引到佢嘅,就係行家具店,可以布置一下自己間屋。

馬明嚟到丹麥發現原來呢度嘅家品店好出名㗎!
馬明嚟到丹麥發現原來呢度嘅家品店好出名㗎!

希望伙拍蕭正楠、曹永廉 拍「麻甩旅行團」

大台近年常常搵星主持旅遊節目,馬國明就表示自己都好想同圈中好友拍番輯,點名蕭正楠同曹永廉,希望可以拍返套「麻甩旅行團」,一定會好開心!睇完《Do姐再Shopping》,睇嚟又可以期待一下啦!

馬明喺訪問裡面表示,自己去旅行都會掛住好朋友啊!
馬明喺訪問裡面表示,自己去旅行都會掛住好朋友啊!

《Do姐再Shopping》
播出日期:11月27日-12月15日(星期一至五)
播出時間:10:30pm-11pm
頻道:翡翠台

延伸閱讀:平均每人$500/晚!香港人遊大阪必試和風溫泉酒店!

《Do姐再Shopping》下星期首播|爆笑農夫再出遊 節目預告率先睇 (含少量劇透)