500蚊求婚大作戰 最細航拍 直升機
廣告
時下流行用 直升機 求婚，但係唔係吓吓都要豪駛40萬，搞到全香港都知先叫有誠意，簡簡單單幾百蚊，一樣可以好感動。Silverlit最近推出咗首隻備有鏡頭嘅最細納米 直升機 ，影相又得，拍片亦得，用嚟求婚都得，得咗！
直升機 機身細小，長約11cm，而且係可摺合式機身，可以收喺搖控入面，方便攜帶。收起後仍然可以影相同拍片，變相成為一部小型相機。
搖控上有兩個按鈕，分別用嚟影相同拍片，操作成功嘅話，搖控上嘅指示燈就會閃動。不過由於機身細小，容納唔到實時顯示屏幕，想知拍成點，就要過返落電腦先睇得返喇。但係鏡頭嘅質素冇一般相機咁好，拍出嚟嘅相同片都只係得640×480。
直升機 以紅外線操控，可向前、後、左、右四個方向飛行，接收距離達20米，飛行時間約4分鐘。依記者測試，充足電嘅情況下，接收的確良好，馬力十足，不過飛咗幾分鐘之後，電力冇咁充足就變得好難控制，連起飛都有難度。所以建議大家帶定尿袋，隨時充電。不過要留意，充電時間大約要20至35分鐘。
如果想認真拍航拍片嘅話，呢架納米 直升機 未必啱你心水，不過如果想試玩模型 直升機 ，又或者氹吓女仔，呢個就係唔錯嘅選擇喇！你睇，Katie BB畀我氹得幾開心！
Silverlit 摺合式攝錄 直昇機
售價：$548
零售商：JC Shop
電話：3148 9455（觀塘分店）、3102 2783（銅鑼灣分店）
