冰酒店
冰酒店

【酒店批評】 無下次!零下20度住 冰酒店 一次就夠皮

旅遊

廣告

今年冬天凍都唔凍下,Count down當日竟然可以短袖衫加薄褸出街,差不多4年前的今日,我去到挪威北部的北極圈內採訪,除咗睇極光之外,住冰屋酒店亦是那次旅程的重點項目!去過北海道雪祭、去過聖誕老人競技賽、也去過俄羅斯極凍雪村,呢次可算是本人首次住 冰酒店 ,不過,我可以好firm咁講,一次就夠皮,無下次!

入住日期:2013年1月28日
地點:挪威Kirkenes
酒店:Kirkenes Snow Hotel
採訪:fancare

一年一度 雪地限定極定冰酒店

入住冰酒店有何感覺?最深刻的印象,正如酒店負責人Helge的忠告:「住完第一晚,才考慮是否想再試多一夜吧!」還記得我從Tromso坐郵輪經過挪威最北端的North Cape,來到最貼近俄羅斯的城市Kirkenes(都真係無雷公咁山卡啦),時值1月時分,日短夜長滿地白雪,而且一年只有冬季才有得住冰酒店,天時+地利+人和,當然要體驗一下。

甫Check-in酒店,外表白雪雪沒啥特別的雪洞內果然別有洞天,冰雕雪雕加埋冰燈冰酒吧,影相真係幾靚。住冰酒店,總會標榜冰窖內長時間維持攝氏-4度,比起室外零下十幾廿度「舒適」(明明當地酒店實有暖氣,點會零下4度係賣點?),而且酒店會提供極耐寒睡袋,足以度過雪藏之夜,我參加埋酒店安排的冰湖鑿冰捉皇帝蟹day tour、吃飽鮮甜蟹棒肉之後,戲玉終於上演--瞓覺!

紮粽寒戰9小時

回到我的冰室,根據指示,只要穿上薄衣、棉襪和冷帽,鑽進重形睡袋就可保持體溫於30多度,起初還好地地瘋狂拍照,到真正躺下來瞓,才發現,冰房好光猛喎!是咁的,冰酒店通常為了看起來夢幻,在牆身、床下底、門框等等想像得到的位置都加入大量燈飾,夜晚是不能關燈的!即使關掉大部分燈,雪白的房依然亮麗耀眼,需要經過好一段時間才能入夢。

睡覺時,戴晒頸巾、冷帽、冷襪瞓,體溫還頗舒適,只剩下面部暴露於空氣中,瞓唔夠一陣,醒了,眼光光,手埋藏在睡袋核心睇唔到錶,唔知幾點,再瞓,又瞓唔夠一陣,寒冷氣温下實在難以安眠,而且冰室又沒有窗,不知天光天黑,那晚,都幾難捱,而且愈瞓愈沾寒沾凍,心諗,幾時先天光?矇矓間聽到房外有人聲,應該天光了,而且寒冷天氣極急尿,我要破繭而出,但離開睡袋一刻溫差超!級!大!真心打住冷震光速著返件雪凍了的大褸和鞋,震住衝去冰屋30米外的木屋小解,好彩安全抵壘!(隔籬房話,下次可以將外套攝埋入睡袋同眠!)畢生難忘的體驗,係要試一次嘅,但係,一次就夠!

INFO>Snowhotel Kirkenes
網址:kirkenessnowhotel.com
房價:2,675挪威克朗(約HK$2,400)
參觀入場費:630挪威克朗(約HK$565)